Saga Guðrún & Arney Vaka

Við erum hér ennþá í allri rigningunni og hefur verið hálfgerður sumarbústaðafiðringur í okkur þvi mikið rignir og setið er inni og keppst við að lesa, borða og leika sér
Ætla svosem ekki að hafa þetta neitt lengra nema mig langaði til þess að deila því með ykkur að Vökulúsin gerði sér lítið fyrir í gær og velti sér í fyrsta skipti. Af bakinu yfir á magann. Hún er búin að endurtaka leikinn í dag og mikið reynt núna í kvöld og öskrað af reiði og gremju þegar ekkert gengur Það er frekar stolt Vaka sem lendir síðan á maganum með smá aðstoð

Þá erum við stórfjölskyldan komin til Noregs Sitjum þessa stundina inni í skýjuðu veðri og rigningarlegu. Samt sem áður er þeta alveg frábært allt saman!

Ferðalagið gekk alveg ótrúlega vel. Það var ekki á sætustu systrunum að sjá að þær væru ræstar kl.4:30 og kjaftaði hver tuska á Sögu Guðrúnu og ég lýg því ekki að hún kjaftaði og lék sér stanslaust til kl13 að íslenskum tíma. Sú litla var líka sjálfri sér lík, flugferðin var ekkert mál nema Sagan var soldið eirðarlaus en þetta tók bara rúmar 90 mínútur svo það var nú ekki mikið mál. Saga Guðrún tók frænku sína á orðinu með að allir dagar í Noregi væru ís og nammi dagar og stútaði fyrsta ísnum á flugvellinum. Það er heldur ekki að sjá að hún hafi ekki hitt Steinunni síðan í október og Valdemar í meira en ár því að þau eru sko strax orðin súper góðir vinir. Svo eru foreldrar Valdemars staddir hérna líka og hún er alveg alsæl með þetta fyrirkomulag. Hér er alltaf einhver og oftast tveir sem hægt er að plata til þess sem hún vill. Arney er síðan alveg eins og venjulega, eins og hugur manns og bræðir allt og alla.

Þetta var bara svona pínu pistill frá Bergen - ætla að fara í ísleik og borða meiri karamellur og sjá til hvað fólkinu mínu langar til þess að gera í dag

Það er ekki ofsögum sagt að við höfum átt æðislega helgi fjölskyldan!! Við Saga fórum á föstudagsmorguninn í sund með Soffíu & Sigríði Björgu og er Saga alveg eins og bavíani í sundi. Það var rosalega gaman hjá þeim vinkonunum, en þó að Saga sé dugleg leggur hún ekki í rennibrautina en fannst ægilega gaman þegar S&SB fóru í rennibrautina, klappaði saman lófunum og hrópaði aftur aftur!! Síðan brunuðum við heim og fórum beint niður í bæ með ömmu og Mörtu og röltum um miðbæinn og fórum á kaffihús og svona. Þegar heim var komið fluttum við okkur út í garð og Soffía & Sigríður Björg komu í heimsókn og sprelluðu vinkonurnar lengi vel í garðinum á meðan mömmurnar flatmöguðu á teppi í sólinni.
Á laugardagsmorgninum héldum við mæðgurnar aftur í sund og sprikluðum vel og vandlega. Eftir blund seinnipartinn fórum við í gönguferð í Elliðaárdalnum sem byrjaði með miklum látum - Saga rak tærnar í stein og grét heil ósköp yfir þessum hrakförum. Þegar lengra var liðið á gönguferðina sáum við að hún hafði hruflað á sér allan handlegginn og átti hún þá aftur voða bágt. Eftir gönguferðina fórum við í mat á Kópavogsbrautina, þar sem var hoppað og skoppað og öllum stjórnað með harðri hendi.
Við tókum daginn snemma á sunnudaginn og byrjuðum í Grafarvoginum. Þar var Iðunn kvödd en Steinunn er að hita upp fyrir stórjfölskylduna með að stjana við Iðunni í heimsókninni þessa dagana Síðan ókum við beinustu leið í Dýragarðinn í Slakka og hittum þar Elvar, Erlu & Daníel Breka í steikjandi sól og hita. Saga var á þunnum kjól og Arneyju var stórlega misboðið og grét sáran þar til við áttuðum okkur á að fækka þurfti fötum á henni og hún varð ekki ánægð fyrr en hún var bara á samfellu með hatt. Lá þannig spriklandi í vagninum og leið mjög vel. Eftir að hafa skoðað dýrin og prófað leiktækin og hesthúsað tveimur ísum og einum svala var haldið í Árnes, þar sem við keyptum pylsur og svona og brunuðum svo upp í Búrfell að grilla. Við lágum í garðinum og höfðum það rosa gott og fórum svo á róló - allan tímann var þessi líka blíða og allir glymrandi hressir. Saga klifurköttur prófaði klifrugrind og fannst það gaman svo lengi sem hún vissi að mamman hélt við hana.
Það eru komnar inn myndir frá helginni, óhemju margar en það var svo erfitt að velja.
Á laugardagskvöldið byrjaði Saga að segja brandara. Hér á eftir koma tveir góðir:
“Á ég að segja þér brandara? Keyptu þér brjóstahaldara…og nærbol”
“Á ég að segja þér brandara? Keyptu þér stól”
Það er mikið búið að hlæja og segir hún “á ég að segja þér brandara” í mörgum útfærslum og alltaf finnst henni hún jafn sniðug. Svo segir hún tómatabrandarann í styttri útgáfu og skemmtir sér vel. Orðið “tómatsósa” hefur einhvern töframátt held ég bara
Allir fjölskyldumeðlimir hér í Sólheimunum eru orðnir vel útiteknir og bakaðir og allir farnir að hlakka til ferðalagsins nema Vakan sem veit ekkert hverju hún á von á. Ég hef nú ekki trú á öðru en að hún verði vær og góð eins og venjulega, svo lengi sem við höldum ró okkar. Reyndar hefur hún átti ansi erfiða daga undanfarið, eða þessir erfiðu koma og fara og ekki endilega tveir í röð. Eina sem huggar hana er fingurgómur að naga eða kaldur þvottapoki svo við höllumst að tönnslunum. Síðan er hún voða þreytt á okkur, vill bara liggja sjálf í vöggunni og sofna á meðan við göngum með hana um gólf og skiljum ekkert í því að hún vilji ekki sofna Í kvöld vildi hún síðan bara liggja á teppinu sínu en ekki sitja hjá þessum leiðinda foreldrum sínum. Hún er farin að brosa um leið og hún heyrir hláturinn í systur sinni en stundum fer Sagan yfir strikið og Arney beygir af. Hún er farin að gera svona smelluhljóð með tungunni þegar við gerum það fyrst og er markvisst farin að grípa og toga í dót og hluti sem vekja áhuga hennar. Svo fór hún í sturtu í fyrsta skipti með mömmu sinni, brá svolítið fyrst en leist svo bara ljómandi vel á og skældi heilmikið þegar sturtuferðinni var lokið.

Látum þettagott heita í bili, ég sem ætlaði ekkert að skrifa…

Þá eru allir fjölskyldumeðlimir komnir í frí og er reynt að njóta lífsins um leið og við gerum ýmislegt sem setið hefur á hakanum. Hér er farið seint að sofa og sofið út og systurnar nokkuð sáttar. Það er samt ekki laust við að sú yngri verði dálítið þreytt á áreitinu sem fylgir því að vera með stóru systur allan sólarhringinn en oftast er hún þó hrifin og dáist mikið að henni.
Pabbi & Saga eru búin að vera dugleg að fara í sund og hafa hjólað þangað og haft mjög gaman. Stelpan er mikill sundgarpur og hjólagarpur og er orðin alveg vel útitekin og að sjálfsögðu ótrúlega sæt.
Arney Vaka fór í 4 mánaða skoðun í dag, því við erum á leiðinni út og hjúkkan okkar að hætta. Stelpan er “feit og flott” híhí, farin að nálgast 7 kílóin og heldur sinni kúrvu bara vel. Hún er nýbúin að uppgötva röddina sína og okkur öllum að óvörum þá þenur þessi annars pollrólega stúlka raddböndin hægri vinstri sér til mikillar ánægju. Hún er farin að spjalla mikið meira og hlær og dáist að pabba sínum og systur. Þessi mamma er alveg ágæt líka enda hægt að græða ágætlega á henni. Í dag hefur reyndar litla ljósinu mínu ekki liðið vel og hefur að mestu leyti kúrt í mömmu fangi.
Í dag á Maja móðursystur stórafmæli og er úti á Ítalíu að halda upp á daginn. Við sendum að sjálfsögðu kveðjur í sólina og er Saga búin að syngja nokkrum sinnum fyrir hana í dag, bæði í símann og svo bara soldið hátt!
Ætla ekki að hafa þetta lengra að sinni …

Já það er sko æðislegt að vera til þessa dagana enda engin venjuleg blíða! Það er ekki hægt að segja annað en að sumarfríið hennar Sögu Guðrúnar byrji vel enda varla búið að stoppa hérna heima hjá okkur síðan það byrjaði því við reynum að nýta hverja stund úti í blíðunni.
Að sjálfsögðu erum við búin að fara í Húsdýragarðinn en það er löngu hætt að vera fréttnæmt. Ég er hreinlega ekki frá því að Saga sé farin að fá leið á honum en það er bara svona. Á laugardaginn fórum við í Nauthólsvík á ylströndina og það fannst Sögu ótrúlega skemmtilegt! Hún fór í buslulaugina og mokaði í sandinum og skemmti sér bara mjög vel! Annað en dramatíska lífsreynslan á ströndinni í Noregi í fyrra! Síðan eyddum við síðari hluta dagsins í blíðunni á Kópavogsbrautinni með ömmu afmælisbarni og fleirum. Í dag fórum við stelpurnar ásamt Ólöfu frænku sem ætlar að vera með okkur þessa vikuna í bæinn. Löbbuðum allan Laugaveginn og gáfum öndunum brauð og stelpurnar sprelluðu svo í Hljómskálagarðinum og enduðum svo daginn á ísbúðarferð. Það er ekki laust við að pabbinn hafi verið grænn af öfund að vera ekki kominn í sumarfrí með okkur Í miðbænum í dag var hópur af ferðalöngum frá Japan sem ætlaði vitlaust að verða yfir systrunum og heill hópur manna sem myndaði þær í bak og fyrir. Sögu fannst þetta ekki sniðugt og var frekar feimin en Arney sýndi öllum hver er sætust
Það fer ekkert framhjá neinum að Saga Guðrún er endalaus snillingur. Við erum að taka daglúrinn hennar út úr prógramminu núna, eða amk að skoða það og við vorum að ræða það að hún væri nú orðin svo stór. Síðan virtist heimurinn ætla að farast hér í kvöld þegar komið var að háttatíma, hún er nefnilega orðin stór stelpa og hætt að sofa! Með því að hætta að sofa hlýtur hún að eiga að hætta að sofa á nóttunni líka! Hún áttaði sig samt þegar að hún fattaði að við svæfum víst öll á nóttunni!! Systir hennar er eitthvað að misskilja þessa svefnþjálfun hér og finnst óþarfi sjálfri að sofa … dauðþreytt og ómöguleg í kvöld eftir að hafa sofið í 40 mín síðan kl.11 í morgun! Litli spekingurinn okkar! Henni fannst ekki leiðinlegt að sprikla berleggja í vagninum í dag … hélt sér vakandi allan þennan göngutúr og meira til. Verður vonandi sofið vel á heimilinu í nótt