Saga Guðrún & Arney Vaka

Þá er Arney Vaka orðin 3ja mánaða gömul og fór í skoðun af því tilefni. Hún var orðin 6340 gr og 63 cm - heldur sínu striki bara vel. Er bara ótrúlega flott stelpa sem við að sjálfsögðum vissum. Hún fékk síðan sína fyrstu sprautu og varð alveg skelfilega móðguð yfir þessu öllu saman og lét alveg hvína í sér.
Saga Guðrún vaknaði rauðeygð og pínu þrútin á föstudaginn og eftir leikskóla var aðeins farið að vella úr auganu. Þetta var nú alls ekkert mikið fyrr en eftir annasaman laugardag. Eftir ferð á læknavaktina og tilheyrandi grát og dramatík var farið að blæða úr auganu og stelpurófan uppgefin. Í morgun tók það hana svo heila tvo tíma að opna augun en hún átt svo ágætan dag frameftir degi. Eftir síðdegisblundinn var allt upp í loft og daman ómöguleg. Ef hún verður ekki betri í fyrramálið ætla ég að hafa aftur samband við lækni. Hún er nú ansi gjörn á að fá þessar sýkingar en hún hefur aldrei fundið svona til með sýkingunum. Hún grét hérna á okkur í dag: “taktu sýkinguna taktu sýkinguna.” Litla lúsin!

Í gær fórum við foreldrarnir í brúðkaup. Arney Vaka fór í fyrsta sinn í pössun og var eins og ljós hjá ömmu Eddu og var alsæl þegar mamman kom og fyllti á hana. Saga átti síðan yndislegan dag með Iðunni & Ara (og Maju og Brynjari), keypti blóm og fór í sund og svona ýmislegt brallað. Leiðinlegur endir á annars frábærum degi hjá dömunni. Í dag fórum við mæðgurnar þrjár saman í Húsdýragarðinn og dobbluðum afa með okkur. Sögu fannst það mjög spennandi og skemmti sér vel við að snúa afa sínum í kringum sig Hún er orðin ansi heimavön á þessum slóðum og bað meira að segja um að fá að skoða dýrin á heimleiðinni. Eitthvað er hún ekki með dýrin á hreinu, kallaði folaldið kiðlinga og hestana kusur og svona ýmislegt en maður getur nú ekki haft allt á hreinu! Við fórum líka í Húsdýragarðinn í vikunni og vorum svo heppnar að sjá Skoppu&Skrítlu í boði Krafts sem stóð fyrir fjölskylduhátíð. Saga var ekki jafn hrifin af Dýrunum í Hálsaskógi og vildi bara fara heim! Svo spókuðum við okkur í Miðbænum og borðuðum svo kvöldmat úti hjá ömmu Eddu þar sem Saga mátti ekki vera því að borða því trampolínið trekkti svo.

Þetta er síðasta vika Sögu á leikskólanum í bili þar sem hún er að fara í sumarfrí eins og fleiri. Vonandi dregst þessi sýking ekki á langinn svo hún komist þangað enda verður svolítið erfitt að fara í frí þar sem hún elskar leikskólann! Hún verður í fríi í ca. 5 vikur - spurning hversu fljótt aftur hún fer á leikskólann eftir Noregsferðina. Hún er voða spennt og allt sem kallast eitthvað sumar á að taka með sér til Noregs. Hún sagði líka í gærmorgun þegar pabbi hennar var að reyna að sannfæra hana um að Kolur ætlaði með henni í sund: “mamma mannstu þegar Steina frænka setti buffið mitt á hundinn sinn?!” en það átti sér einmitt stað í Noregsferð síðasta sumars. Mér finnst nú eiginlega ótrúlegt að barnið muni svona langt og hallast að því að myndir af Frk. Frigg með buffið hafi varðveitt þessa minningu. Steina frænka náði þeim áfanga í kvöld að skilja allt sem frænka hennar sagði henni í símanum svo samskiptaörðugleikarnir ættu ekki að verða miklir og vonandi verður Saga jafn fáránlega fljót að aðlagast Noregsbúunum okkar og í fyrra

Við fjölskyldan áttum yndislega helgi þó það hafi skyggt aðeins á að Saga Guðrún varð veik aðfaranótt föstudagsins og var veik á laugardaginn líka! Hún var mjög lasin stuttu áður en halda átti í veisluna en fékk verkjastillandi og náði að taka gleði sína. Veislan var alveg frábær og Saga Guðrún naut þess í botn að leika við frænkur sínar. Hún var svo algjörlega búin á því þegar að frænkurnar yfirgáfu samkvæmið! Pabbinn, stjarna dagsins var líka mjög ánægður og það var meira að segja klappað fyrir honum þegar hann gekk niður af sviðinu þar sem hann var sá eini að útskrifast úr hugbúnaðarverkfræði! Ekki ónýtt það! Láta fulla Laugardalshöll af fólki klappa fyrir sér! Arney Vaka var pínu viðkvæm fyrir látunum í veislunni en kúrði sig bara í moby og tók svo gleði sína á ný!
Við sendum veikindunum svo langt nef þegar Saga vaknaði hitalaus og hress og héldum niður í bæ. Það var ótrúlega spennt Saga sem klæddi sig sko í Sollu Stirðu sokkabuxur og Sollu Stirðu eyrnaband og felldi nokkur tár yfir óhreina Sollu Stirðu bolnum - því hún var sko hörð á því að hún ætlaði að fá Sollu Stirðu blöðru! Mér leist ekki á blikuna þegar þannig blöðru var hvergi að sjá í sölutjöldunum en mér var sko stórlega létt þegar ég kom auga á þær í 10-11. Við hittum svo Erlu og Elvar og Daníel Breka og Saga prófaði hoppukastala og ýmislegt. Blöðrurnar í bænum voru samt vinsælastar! Svo löbbuðum við heim til ömmu og afa þar sem bíllinn beið eftir okkur, fengum rjómaköku og brunuðum svo heim að grilla og í rúmið! Saga var ansi uppgefin eftir daginn, en hún er alveg ótrúlega þreytt þessa dagana en gengur samt illa að koma henni í rúmið. Hún virðist líka vera með mikla vaxtarverki þessa dagana og hefur kvartað undan verkjum í fótunum í nokkrar vikur af og til.
Í síðustu viku fór daman á brúðubílinn með leikskólanum, akkúrat daginn sem ég ætlaði að athuga hvenær yrði farið því mig langaði svo að fara með henni En maður verður víst að missa af sumu, fer bara með þeim báðum næsta sumar Mér skilst að hún hafi skemmt sér vel, amk verið stillt og góð!
Jæja, látum þetta gott heita að sinni

Við erum aldeilis búin að brasa ýmislegt síðan við skrifuðum síðast! Það er nóg að gera hjá stórfjölskyldunni og á meðan stelpurnar eru vakandi er sjaldnast laus stund. Dætur mínar eru náttúrulega bara flottastar og skemmtilegastar af öllum. Við erm búin að nýta góða veðrið sem hefur bankað upp á vel og vorum að draga Sögu Guðrúnu inn á kvöldin um átta leytið alveg snælduvitlausa og skítuga upp fyrir haus! Húsdýragarðurinn hefur fengið að njóta þess að hafa okkur mikið þar og garðurinn okkar góði svíkur engan! Saga hefur verið dugleg að æfa sig í að hjóla og Arney er dugleg við að drekka og stækka og mannast!! Núna er stutt í útskriftina hjá pabbanum - bara tveir dagar og undirbúningurinn að fara á fullt! Saga er að sjálfsögðu spennt fyrir veislunni og er búin að telja upp flesta sem hún þekkir til að athuga hvort að þeir komi ekki örugglega! Skiptir nú ekki öllu máli hverjir mæta því ef ég þekki dóttur mína rétt mun hún vefja þeim sem mæta um fingur sinn hvort sem þeim líkar betur eða verr! Það var einn gestur hjá okkur sem brá sér á trampolínið út í garði með Sögu og vildi meina að eftir því sem hún hoppaði hraðar þá hefði hún talað meira! Ég veit eiginlega ekki hvað fólk er að meina … litla skottið líkist mömmu sinni amk í masandanum!
Mér finnst þær systurnar vera sífellt að líkjast hvor annarri meira og meira. Það er aldeilis ekki leiðum að líkjast! Arney Vaka er nú eitthvað rólegri en systir sín samt sem áður en á sama aldri var Saga Guðrún farin að velta sér í báðar áttir. Arneyju Vöku dettur ekki svoleiðis vitleysa í hug, enda sjálfsagt að nýta sér þjónustu annarra svo lengi sem hún er í boði! Mamman er þó ekki frá því að sú litla ætli að flýta sér í tanntökunni eins og systir hennar, en fyrst ég er farin að hugsa um það fær hún sennilega ekki tönn fyrr en eftir eins árs! Saga er alltaf jafn ánægð með systur sína og sú litla ljómar þegar hún heyrir í henni. Við foreldrarnir erum náttúrulega alsæl með þær báðar og trúum því ekki hvað tíminn líður fljótt! Svo er bara rúmur mánuður í Noregsför og eru stelpurnar vel settar af sumarlegum kjólum og fötum til að nota í útlandinu - eins gott að veðrið leiki við okkur! Saga Guðrún heldur að allar sumarlegar myndir séu teknar í Noregi í fyrra En við verðum að sjálfsögðu með sokkabuxur og gúmmístívél í töskunni líka enda við öllu búin!
Sandra Gautaborgarbúi kom í heimsókn í gær en hún er nú flutt til Íslands. Saga Guðrún ákvað af þessu tilefni að Sandra væri nýja uppáhaldskonan hennar, bað hana um að svæfa sig (hætti reyndar við þegar á hólminn var komið) og bannaði henni að fara heim. Þegar hún vaknaði svo í morgun spurði hún hvort að Sandra væri ekki örugglega frammi! Algjör mús og ég hef það á tilfinningunni að Söndru leiðist ekki þessar vinsældir heldur!

Í dag var sko aldeilis skemmtilegur dagur hjá Sögunni okkar! Við byrjuðum daginn á því að fara í skírn og skírnarveislu og fannst henni afar merkilegt að fá að fara í kirkjuna enda man hún ekki eftir annarri kirkjuferð. Hún þurfti síðan auðvitað að pissa í miðri athöfn eins og við var að búast en svo þegar í veisluna var komið naut hún sín í botn. Hún og frænka hennar frá Bandaríkjunum urðu rosa góðar vinkonur og léku sér mikið saman og Saga færði henni líka smá pakka Hún var úrvinda þegar við komum heim og fékk sér blund og stuttu eftir að hún vaknaði skelltum við mæðgurnar okkur á tónleika.
Sinfóníuhljómsveitin var með útfærslu á Ávaxtakörfunni í Háskólabíó og þar sem að Saga hefur verið mikill aðdáandi Ávaxtakörfunnar síðastliðna mánuði (og Arney Vaka þekkti tónlistina þegar hún fæddist) fannst okkur kjörið að prófa að fara með hana. Um leið og tónleikarnir hófust byrjaði hún að klappa og iðaði í sætinu og skemmti sér hið besta. Hún var alveg yfir sig hrifin þó að hún hafi nokkrum sinnum tekið fyrir eyrun þegar sem hæst lét í hljómsveitinni! Litli snillingurinn minn átti eitt gullkorn þarna - spurt var hvernig myndi heyrast í fílahjörð sem flygi hjá (lína úr vinkonu laginu) en snillingurinn misskildi spurninguna og sagði mér upprifin að þá þyrfti fílarnir vængi!! Haha þetta krútt! Hún hélt semsagt að spurt hefði verið hverng fílarnir ættu að fljúga! Næst á dagskrá af svon viðburðum hjá henni er að fara í bíó svona á næstum vikum/mánuðum, sennilega bara með haustinu svo maður sé ekki að eyða sumardögum í bíó.
Á morgun er líka spennandi dagur framundan því vinir okkar úr október-mömmuklúbbnum ætla að koma í heimsókn til okkar. Saga man ekki stundinni lengur hvað þeir heita en er samt hörð á því að þetta sé allt saman vinir hennar Verður án efa skemmtilegt að hittast á morgun og Arney Vaka hefur ekki enn hitt þetta stórskemmtilega fólk né það hana