Saga Guðrún & Arney Vaka

Þá er stærsti hluti jólanna, eða a.m.k. mestu hátíðarhöldin liðin hjá og við búin að hafa það afskaplega gott. Saga Guðrún er loksins orðin sæmilega hress og hefur verið alveg ótrúlega stillt og góð. Hún stóð sig eins og hetja í öllu pakkaflóðinu á aðfangadag, varð pínu spennt en alveg í ótrúlega góðu jafnvægi og náði á endanum að klára alla pakkana. Hún fékk mikið af fallegum gjöfum og er alsæl þessa dagana að vinna í því að skoða og prufa það sem hún fékk. Það er alveg ótrúlegt hvað þetta er heppin stelpa sem við eigum Hún fékk lítið eldhús frá okkur sem hún hefur mikið leikið með og eins fékk hún krítartöflu úr Ikea sem hefur ekki fengið mikinn frið. Bleika krítin úr pakkanum sem fylgdi er orðin áberandi minnst Henni finnst líka eiginlega jafngaman að þrífa töfluna eins og að kríta á hana. Við fórum síðan í jólaboð bæði á jóladag og annan, á jóladag var hún svo þreytt að hún gat varla notið sín eins og venjulega en í gær var hún í miklu stuði og vældi alla leiðina heim yfir því að þurfa að hætta að leika við Kolbrúnu og Drífu. Við mæðgurnar erum svo í fríi í dag og eins og á morgun og sofum til hádegis og dúllum okkur síðan. Ætlum svo á leikskólann á föstudaginn í rólegheitastemminguna sem án efa ríkir þar. Hún bað reyndar um að á að fara á Holt til Erlu sinnar í dag en skemmti sér vel heima í staðinn.

Tíminn líður ótrúlega hratt og erum við í flutningahugleiðingum núna. Ef allt gengur upp ættum við að vera flutt eftir ca. mánuð í annað húsnæði, en það verður bara að koma í ljós hvernig það fer. Það eru líka bara þrír mánuðir í litla bumbubúann, alveg með ólíkindum. Það var nefnilega bara í gær sem við vorum að bíða eftir Sögu Guðrúnu - jafnvel þó hún sé orðin svona stór. Það eru semsagt frekar spennandi tímar framundan hjá okkur og áðru en við vitum af verðu við farin að ferma

Já, nú eru jólin komin eins og Saga Guðrún komst að orði í morgun og svo sagði hún: “ég er búin að lúlla” sem er setning sem heyrist ekki oft í orðaforða litlu svefnpurkunnar. Hún er loksins að hressast af veikindunum en hún er búin að vera lasin allan desembermánuð, mætti þrisvar sinnum á leikskólann allan mánuðinn takk fyrir! Hún hefur því farið á mis við ýmislegt í jólaundirbúningnum en við höfum reynt að bralla ýmislegt skemmtilegt hérna heima í tilefni jólanna, svona eftir því sem heilsa og tími leyfa.
Í morgun fékk svo daman skyr og rjóma í morgunmat í tilefni dagsins, sem fellur aldeilis í kramið hjá henni því henni finnst rjómi betri en allt annað. Hún vill rjóma frekar en bæði ís og súkkulaði. Við mæðgurnar ætlum í pakkarúnt núna með afa Adda og skila af okkur síðustu pökkunum en síðan er það bara bjútíblundur og jólabaðið sem hún bíður spennt eftir. Hér er mikið gjafaflóð á bænum og daman er voða spennt fyrir pökkunum. Hún er búin að vera mjög upptekin af stórum og pínulitlum pökkum en þeir stóru heilla hana óneitanlega meira í augnablikinu. Það á síðan kannski eftir að breytast þegar líður á daginn.

En við viljum bara nota tækifærið og óska ykkur öllum gleðilegra jóla og vonandi njótið þið hátíðanna í botn.

Ég er öll að hressast en er samt ennþá soldið lasin! Ég er með eyrnabólgu í báðum eyrum og búin að vera alveg rosalega kvalin. Lítið búin að sofa og eiginlega bara búin að halda um höfuðið á mér. Núna er ég samt öll að hressast, hef sem betur fer ekki haft neinn hita að ráði og bara verið ósköp góð svona á mili þessi sem mér verður virkilega illt í eyrunum! Við stálumst samt út í klippingu áðan og ég er eiginlega komin með alveg stutt hár bara Ótrúlega sæt og fín og eiginlega alveg eins og amma Edda var þegar hún var lítil stelpa! Mömmu og Steinunni brá næstum því bara í miðri klippingu þegar þær sáu það!!
Mamma fer í síðasta prófið sitt í fyrramálið (jibbí) og eftir það ætlar hún að koma heim og sækja mig en planið er að ég sofi út en þá ætlum við að mæta á leikskólann í seinna lagi - vonandi verður hún dugleg í prófinu svo ég geti náð jólamatnum sem verður en við náum a.m.k. pottþétt jólaballinu Pabbi ætlar líka að koma á ballið svo það verður ábyggilega tekið fullt af myndum. Síðan ætla ég að taka helgina í að láta mér batna því við mamma ætlum að bardúsa ýmislegt á þessum dögum og vonandi kemst ég í elsku besta leikskólann minn! Ég er búin að vera heima í næstum tvær heilar vikur!!

Bræðurnir Stekkjastaur, Giljagaur og Stúfur eru allir búnir að heimsækja mig og ég stelst alltaf reglulega yfir daginn að kíkja í skóinn ef einhver skyldi vera á rúntinum. Ég þori engan veginn að hafa gluggann tóman! Ég er voða spennt orðin að hitta jólasveinana á morgun - ætla að biðja þá um að hjálpa mér að opna pakkann. Mamma og pabbi eru sannfærð um að ég verði ekki jafn brött á morgun þegar á hólminn verður komið - því ég er frekar hrædd við þessa skrýtnu kalla. Dagatalið er líka mjög vinsælt enda fullt af glimmeri

Það þarf sterk bein til að vera Saga Guðrún þessa dagana! Hún var orðin frísk á fimmtudaginn, eyddi föstudeginum í rannsóknum á barnaspítalanum út af nýrunum og er svo orðin sárlasin aftur í dag! Byrjaði að kvarta um í eyrunum á leiðinni í leikskólann … stoppaði svo bara í 40 mínútur grátandi og aum á leikskólanum og fékk að vera heima með pabba. Þau kíktu í heimsókn til læknisins sem sagði að það væri sáralítil bólga en skrifaði nú samt upp á sýklalyf ef hún fengi hita og svona með þessu. Seinnipart dags var svo haldið áfram að gráta og búið að gráta stanslaust síðan þrátt fyrir verkjastillandi og svo lognast hún út af og sefur og á milli grátkviðanna.
Það hefur lítið farið fyrir jólaundirbúningi núna hjá dömunni og það stefnir í að hún missi af öllu tilstandinu á leikskólanum. Við setjum samt stefnuna á að mæta hressar á jólaballið á föstudaginn. Við sitjum og krossum putta yfir að daman eigi eftir að sofa í nótt því að við erum bæði í prófum í fyrramálið. Amma Edda ætlar að koma og passa hana á meðan ég fer í prófið - vonandi verður hún orðin sprækari í fyrramálið.
Þetta er ekki skemmtilegt ástand en við vonum bara að hún verði orðin góð og sjálfri sér lík til að hún geti notið jólanna.
Það var frekar mikil hamingja með sendingu jólasveinsins sem beið eftri henni í skónum í morgun en hún er frekar undrandi á því að hún fengi aftur í nótt. Verður gaman að sjá hvernig hún bregst við í fyrramálið - hvort áhuginn verði meiri
Jæja, varð bara að skrifa smá fréttir - er búin að vera frekar dugleg að setja inn myndir undanfarið. Hér tökum við öllum mögulegum og ómögulegum batnaðarstraumum hérna þessa dagana

Það er ekkert grín að vera Saga Guðrún þessa dagana! Hún er búin að vera með bullandi hita alla helgina, ljótan hósta og alveg hrikalega slöpp. Í kvöld mældum við hana og daman var með 40° stiga hita í dag á fjórða degi svo við brunuðum á læknavaktina. Jújú daman var sárlasin og lækninum leist ekkert á hana. Með bullandi eyrnabólgu í báðum eyrum, slæma hálsbólgu, augnsýkingu & lækninum fannst ekki heldur ósennilegt að hún væri komin með í kinnholurnar líka. Þar að auki áttum við að taka þvagprufu og senda í ræktun í vikunni!! Hún er alveg ferlega lasin og gerir fátt annað en að drekka djús og liggja í fangi og vola. Stefnan var líka að fara í rannsóknir upp á barnaspítala á föstudag en ég þarf að sjá til hvað læknarnir þar segja m.t.t. til veikindana.
Svo fyrir utan þennan pakka byrjar mamman í prófum á morgun og kom ekki alveg nógu vel út í mæðraskoðun í morgun. Pabbinn byrjar í prófum í næstu viku og vonandi verður lífið komið í réttar skorður þá. Það verður bara hreinlega að koma í ljós hvað verður með þessi próf hjá mér … en skólinn er samt ekkert að hlaupa í burtu Saga Guðrún & litla bumbukrúttið eru að sjálfsögðu í 100% forgangi.
Ohhh ég get ekki beðið eftir janúar mánuði