Saga Guðrún & Arney Vaka

Saga Guðrún var afmælisstelpa á leikskólanum í dag og átti afskaplega bágt. Þetta var erfiður dagur - fyrst vildi hún ekki kórónuna, henni fannst hræðilegt að láta syngja afmælissönginn, vildi ekki vera úti og alls ekki fá að borða. Elsku stelpan hefur bara verið útkeyrð af þreytu eftir hátíðarhöldin. En hún fékk pakka frá Sigríði Björgu vinkonu sinni og þær voru algjör æði þegar þær hjálpuðust að við að rífa hann upp Síðan tók hún kórónuna í sátt og er búin að vera með hana mikið í dag. Kennararnir hennar voru svo æðislegar að taka fullt af myndum fyrir okkur og þær eru komnar inn í afmælisalbúmið svo endilega kíkið líka á þær.

Nú er afmælishelgin langþráða liðin og ekki hægt að segja annað heldur en að fjölskyldan hér í Fellsmúlanum sé dálítið lúin. Hátíðarhöldin hófust í gær þar sem öllum ömmum og öfum skvísunnar var boðið til veislu hjá ömmu Eddu á Kópavogsbrautinni. Saga Guðrún stóð sig vel á föstudagskvöldið - hjálpaði til að við útbúa súpu og köku til að bjóða upp. Hún varð pínu vandræðaleg við sönginn og kertablásturinn en ekkert í líkingu við það sem var í dag þegar kom að því, því hún fór í algjöra flækju og hvíslaði aftur og aftur að mér: “mamma nei mamma nei.”
Prinsessan var svo vakin í morgun með kertaljósi, afmælissöng og að sjálfsögðu pökkum og fannst það ekki leiðinlegt. Byrjaði á að opna mjúkan pakka frá okkur en það sem hún ljómaði þegar stóri harði pakkinn mætti svo rétt á eftir. Hún dundaði sér svo í morgun, hjálpaði til við baksturinn og hjálpaði til við tiltekt og draslaði út til skiptis. Þegar hún svo vaknaði af blundinum og sá að prinsessukakan var komin á borðið náði hún bara í stól og heimtaði disk. Við náðum þó að sannfæra hana um að bíða eftir krökkunum og hún raðaði í súkkulaðirúsínum á meðan hún beið. Framan af var hún rosalega dugleg í að taka upp pakkana en svo fékk hún leið á því og þeir voru lagðir til hliðar. Eins og ég sagði áðan hafði hún ekki mjög gaman af afmælissöngnum og rétt nartaði í langþráðu prinsessukökuna. Hún fékk margar fallegar gjafir og held ég að það sé óhætt að segja að Sollu Stirðu bolurinn frá langömmu Drífu og læknadótið frá langömmu Rönku hafi staðið upp úr. Já og að ógleymdu prinsessupúslinu frá Steinunni og Halla sem er búið að púsla áreiðanlega hátt í 100x í dag. Reyndar hafði hún nóg að gera í dag við að sinna gestunum sínum og leika við vinkonur sínar og frænkur svo við eigum eftir að skoða gjafirnar betur saman í rólegheitunum þegar afmælisæðið er runnið af henni. Einhvern veginn hlýt ég að fá hana til að máta fötin og svona Hún fékk æðislegan snjógalla sem ég fékk hana til að máta en hún var fljót að fara úr honum enda alltof heitt.

Fyrir akkúrat ári síðan ákvað Saga Guðrún að það væri komin tími á eitthvað stórt afrek og byrjaði að labba eins og herforingi eftir að hafa daðrað við það í nokkrar vikur. Núna undanfarna daga hefur hún verið alveg ótrúlega dugleg með koppamálin og búin að segja til síðan á fimmtudaginn í hvert sinn hérna heima að undanskildu einu slysi. Núna í kvöld var svo að hennar mati kominn tími til þess að taka eitt skref enn og kúkaði á koppinn sjálfri sér til mikillar undrunar. Hún horfði á mig stórum augum og sagði svo: “mamma, STEINN í koppnum” híhíhíhíhí Yndisleg alveg. Nú verður annað aldursári og vonandi verður daman orðin bleyjulaus á næstu vikum. Með nóg af hrósi á þetta eftir að ganga rosalega vel en þessar miklu framfarir sem komu allt í einu má þakka því að besta vinkona hennar á leikskólanu, sem hún alveg dáir og dýrkar var bleyjulaus í fyrsta skipti í vikunni.

Hún ætlaði aldrei að sofna í kvöld en á endanum hafðist það enda er hún pínu spennt fyrir morgundeginum að fara sem afmælisbarn á leikskólann. Ég ætla að fara í það fljótlega að setja inn restina af októbermyndum en hef ekki staðið mig vel undanfarið í myndamálum. Núna held ég að ég verði að elta dóttur mína í draumalandið ef ég get hætt að undra mig á hversu hratt tíminn líður. Fyrir akkúrat tveimur árum var ég með hana 40 mínútna gamla í fanginu - litlu músluna. Tíminn hefur flogið áfram en samt er svo örstutt síðan hún var lítil og ósjálfbjarga en er núna ótrúlega stór, dugleg og sjálfstæð stelpa. Hún var svo sæt og yndisleg í dag og hagaði sér ótrúlega vel. Í dag held ég að ég verði að teljast með stoltustu mömmum í heiminum

Já þá eru bara fjórir dagar eftir í að daman verði 2ja ára! Hér verður eins og við má búast mikið um dýrðir um helgina og fær hún hvorki meira né minna en tvær afmælisveislur.
En svona eins og við er að búast þá varð daman veik í gærkvöldi, með háan hita og sjóðheit og óróleg stóran hluta næturinnar. Vaknaði samt eldhress og er ennþá, soldið glaseygð og glær en ekkert sárlasin. Svo við krossum putta og vonum að hún verði upp á sitt besta um komandi helgi En það var svosem við þessu að búast þar sem ég á að vera í skólanum núna … og þá verður hún alltaf veik!

Síðan skrifuðum síðast stendur eitt upp úr. Heimsókn Steinu frænku. Við vorum mikið búnar að ræða þetta mæðgurnar þegar við fórum til Keflavíkur að sækja hana og á leiðinni sáum við að sjálfsögðu flugvél og þá heyrðist í aftursætinu: “ég sé steinu frænku - ég sé steinu frænku í flugvélinni” Svo biðum við spennt eftir því að hún kæmi og þegar Saga Guðrún sá frænku sína þá breiddist út þetta líka bros en svo allt í einu hurfu báðar hendurnar upp í hana og hún hafði ekki hugmynd um hvernig hún ætti að vera við þessa næstum því ókunnu konu. Það háði henni sko ekki um helgina samt sem áður að þær hefðu ekki hisst í þrjá mánuði og var ótrúlega brött. Hún hermdi eftir hinum frændsystkinum sínum þegar ráðist var að henni og hún knúsuð í ræmur og gerði heiðarlega tilraun til að bjóða henni í afmælisveislunni. Vegna of mikils fjölda Steinunna í lífí hennar er ekki alveg víst að það hafi verið sú Steinunn sem um var rætt Svo fannst henni Sögu Guðrúnu ægilegt sport að fara að kaupa nammi fyrir Valdemar og lét kassann góðfúslega af hendi án nokkurra vandkvæða! Og var ósköp skilningsrík þegar Steina þurfti að fara aftur að passa hundana
Já það er sko gaman að vera til þessa dagana, jafnvel þó að Sagan sé ekki alltaf sátt við veðurguðina. Hún er búin að vera alveg þrældugleg að leggja sig á leikskólanum og finnst agalega mikið sport að taka með sér dúkku eða bangsa að heiman til að kúra með. Það fer að koma að því að hún fái að vera lengur - við vorum búin að hugsa um upp úr áramótum eða svo enda er maður alltaf að missa af hálfri dagskrá til að hanga heima með mömmu sinni, sem er nú ekki alltaf skemmtilegasti félagsskapurinn þessa dagana og verð það enn síður þegar lengra líður á meðgönguna.

Kúlubúinn hefur það fínt - sparkar vel og dugleg og pabbinn er meira að segja búinn að finna spark. Stóra systirin verðandi á hinsvegar agalega bágt með þá staðreynd að litla barnið megi sparka og leggur mikla áherslu á það að litla barnið eigi að vera gott og ekki sparka í mömmu sína! Annars er hún ekki lengur með “krák” í maganum heldur Emil, sem er litli bróðir Önnu vinkonu hennar. Hún er alveg hörð á því að hann sé í hennar bumbu en segist alveg vita að hann sé ekki í mínum bumba! Þegar maður er 2ja ára og þekkir bara eitt svona lítið barn þá hlýtur maður að álykta að það sé bara eitt lítið barn í öllum heiminum

Hún var ekki lengi að hrista af sér veikindin hún Saga Guðrún og er núna bara nokkuð hress, þrátt fyrir að mikið kvef og hálsbólga séu að angra hana. Henni líst ekkert sérlega vel á þetta vetrarveður sem núna er að ganga í garð. Hún er alveg rosalega viðkvæm fyrir þessu öllu og í útiverunni á leikskólanum í dag var hún vælandi og volandi allan tímann út af vindinum. Kennararnir hennar héldu að hún hefði jafnvel fokið í rokinu í byrjun útiverunnar og þess vegna væri hún svona - en við þekkjum okkar heimafólk og kæmi ekkert á óvart að hún væri bara að væla! Þegar heim var komið og byrjað að ræða um málið vildi hún meina að vindurinn hefði bitið sig í kinnarnar! Sem fyrir svona litla exemstelpu er svosem alveg rétt en fyrr má nú aldeilis vera pempíuskapurinn að þola ekki smá vind Þetta byrjaði nú samt sem áður um morguninn þegar hún varð alveg brjáluð yfir að hafa ekki vettlinga á leiðinni út á bíl og talaði mikið um að henni væri sko alveg ískalt! Fyrir þá sem ekki vita erum við svona 20 sekúndur á leiðinni frá útidyrunum og inn í bíl - ef það nær því
Helgin var ótrúlega skemmtileg í Sögulandi. Ekki alveg jafn kannski í foreldralandinu þar sem stelpan er mikið fyrir að spila með okkur þessa dagana og athuga hvert hún kemst. En á laugardeginum fórum við í afmæli til Tinnu Mjallar og Saga naut sín alveg í botn. Hún hafði mun meiri áhuga á afmælisgjöfinni en afmælisbarnið sjálft, borðaði krem og snakk og vildi alls ekki fara heim. Á laugardagskvöldið fórum við svo í heimsókn á Álftanesið og þar var hún nú líka í Sssss-inu sínu. Hún ætlar sko að bjóða þeim öllum í veisluna og var voða hissa þegar ég sagði henni að Herki gæti ekki komið í afmælið Þegar kom að heimför þá vildi hún bara lúlla þar og var alveg búin að vera heima!
Í gær var svo afmæli hjá Nönu og framan af afmælinu hagaði hún sér eins og ég veit ekki hvað. Var a.m.k. alveg ferlega ólík sjálfri sér og já, bara óþekk en það rjátlaðist af henni og þegar kom að heimför var alveg sama sagan, búin að vera heima og vildi bara lúlla hjá Nönu. Við komum henni þó heim og sögðum henni að þær myndu hittast aftur þegar Nana kæmi í afmælið. Stuttu eftir heimkomu hringdi dyrabjallan og þá stökk mín: “Nana komin í afmæli” Þegar hún vaknaði í morgun var Nana frænka það fyrsta sem kom fram á varirnar á henni eftir að hún var búin að reyna nokkrum sinnum: “æ, lúlla meira.”

Í dag ætlaði hún að vera í pössun hjá Steina en svaf bara allt saman af sér. Hún var alveg agalega fegin þegar ég sagði henni að Steini ætlaði að passa hana því ég ætlaði að hitta lækninn. Það er ekki í miklu uppáhaldi hjá henni. Við Óli fórum svo í skoðun á Miðstöð Mæðraverndar, eða öllu heldur ég og baunin okkar. Það leit allt vel út en ég á að mæta í blóðprufu (einu sinni enn!!! 4 eða 5 skiptið á þessari meðgöngu) í fyrramálið. Við förum svo til að byrja með á tveggja vikna fresti sem við erum ótrúlega ánægð með. Það er gott að vita að það sé passað vel upp á bæði mig og kúlubúann í svona aðstæðum. Svo er sónarinn 7.nóvember á afmælinu hennar Steinu frænku og það er auðvitað rosalega spennandi. Við getum bara ómögulega ákveðið okkur hvort við eigum að kíkja í pakkann eða ekki. Ég er viss um að þetta sé önnur stelpa en Óli og Saga Guðrún eru viss um að þetta sé “krák” (á sögumáli). Það verður gaman að sjá hvað verður - en í upphafi síðustu meðgöngu vorum við bæði á akkúrat þessari skoðun. Ætli pabbinn hafi rétt fyrir sér í þetta skipti?

Nú er ég orðin lasin Ég vaknaði í fyrrinótt á miðnætti með hita og leið ósköp illa og var vakandi langt fram eftir nóttu. Var svo með háan hita í allan gærdag og átti soldið bágt. Inn á milli, á meðan mér leið vel dansaði ég hálfgerðan stríðsdans og sagði: “ég búin hasin.” Ég var heima með pabba í gær en svo með mömmslu minni í dag og er búin að vera mikið hressari og hitalaus. Er reyndar eitthvað aðeins að slappast núna en vonandi kemst ég á leikskólann minn á morgun! Þó að mamma og pabbi séu nú alveg ágæt greyin þá er miklu skemmtilegra að komast á leikskólann. Ég er samt alltaf sami snillingurinn, kom með símann til mömmu áðan og sagði: “hlingja mónu & adda” híhíhí algjör mús. Fyrir þá sem ekki vita þá eru það amma mín og afi Svo í nótt vaknaði mamma við að ég var að tala upp úr svefni og segja að ég væri búin að eiga afmæli.

Ég verð að vera fljót að hressast því ég er boðin í tvö afmæli um helgina og vill að sjálfsögðu ekki missa af þeim. Tinna vinkona mín og Nana frænka mín eiga nefnilega báðar afmæli. Svo um næstu helgi kemur Steina frænka Veeiiii það verður sko gaman! Við ætlum að fara í langan bíltúr og sækja hana. Ég verð samt ábyggilega frekar hissa á þessu því ef ég er spurð hvar hún er þá svara ég alltaf: “í hímanum” sem er auðvitað alveg rétt Ég sá reyndar bæði hana og Valdemar í webcam í seinustu viku og spyr mömmu stundum núna hvort ég megi horfa á Steinunni&Mandarínu (sem þýðir valdemar á sögumáli).

Þá er enn ein vikan flogin og eins og venjan er þá var sko nóg að gera á bænum.
Saga Guðrún fór á leikskólann og skemmti sér að sjálfsögðu vel eins og venjulega. Síðasta helgi var vel heppnuð - fórum til Tinnu & co á laugardeginum og þær vinkonurnar voru í miklu stuði. Á sunnudeginum fórum við hittum októberkrakkana og það var ekki minna gaman þar og að sjálfsögðu eins og okkar er von og vísa eru komnar inn myndir.
Síðan átti mamman á bænum afmæli í vikunni og Saga Guðrún fór með pabba sínum að kaupa afmælisgjöf. Litla yndið talaði náttúrulega strax af sér þegar hún kom heim enda ekki annað hægt - hún keypti nefnilega “immel okka” sem á okkar máli útleggst sem glimmer sokkar sem henni fannst ekki lítið flottir og féllu að sjálfsögðu vel í kramið hjá afmælisbarninu. Saga Guðrún tók æfingar í að opna pakka með mömmu sinni og mátti varla á milli sjá hvor var spenntari. Henni fannst líka meira en lítið gaman að fá að hjálpa til við bakstur og svona í tilefni dagsins. Á sjálfan afmælisdaginn kom svo megnið af uppáhaldsfólkinu hennar í heimsókn og hún lék á alls oddi. Þær Tinna voru í sama stuðinu og á laugardeginum og er alveg milljón að fylgjast með þeim. Einhver flensudrulla heimsótti svo mömmuna síðar hluta vikunnar og var því minna um skemmtilegheit. Í dag fékk Saga Guðrún þá Iðunni frænku í heimsókn og var í skýjunum með það - bakaði með okkur vöfflur og dobblaði frænku sína í ýmislegt sem foreldrarnir nenna ekki alltaf. Svo má ekki gleyma að við byrjuðum að skipuleggja afmælið og tvö þemu komu til greina hjá verðandi afmælisbarni, prinsessu eða súperman. Ég ætla bara ekkert að kjafta hvort varð fyrir valinu en mamma stjórnaði aðeins í því
Núna er talning dömunnar búin að breytast - fyrst á Tinna afmæli, síðan kemur Steina frænka og svo á hún afmæli. Það er sko nóg að gera á bænum, því inn í þetta stranga afmælis og heimsókna plan er jú vinna og skóli auk þess sem að við litla fjölskyldan erum að hlúa að og passa upp á litla bumbubúann okkar. Jú mikið rétt, Saga Guðrún verður stóra systir í mars eða apríl og er handviss um að litla barnið okkar dafni í maganum á sér eins og mömmunni. Það er ágætt hvað það er átakalaust fyrir hana að hafa það í maganum því það hefur ekki verið alveg sama sagan með mömmuna!

Jæja, látum gott heita enda kominn tími á að halda í draumalandið en Saga Guðrún er búin að vera þar í góða stund!