Saga Guðrún & Arney Vaka

Ég er svo ótrúlega dugleg! Síðustu mánuðina eru mamma og pabbi næstum því búin að þurfa að berjast við mig til að fara í bað og sund því ég er búin að vera svo rosalega vatnshrædd.
En á miðvikudaginn fór ég með mömmu í bað því mamma sagði að þegar maður væri búinn að fara í bað þá fengi maður eitthvað gott. Viti menn, ég fór í bað og mér fannst það alveg æðislega gaman og pabbi tók mig upp úr eftir 45 mínútur því ég var orðin alveg ísköld.
Í morgun fórum við mamma svo í sund með Steinunni&Önnu og ég stóð mig alveg eins og hetja. Ég var bara pínu smeyk í fyrri sturtuferðinni, en svo svamlaði ég um allt, hoppaði út í laugina og var órúlega dugleg og skemmti mér þvílíkt vel Mamma er ekkert smá ánægð með mig núna! Það var svo gaman að við ætlum að reyna að fara aftur á morgun og hinn og hinn…alveg þar til leikskólinn byrjar Ykkar Saga Sundgarpur

Jæja, ég ákvað að setja inn hérna smá brot af ferðasögunni okkar. Saga Guðrún var ótrúlega góð á leiðinni út þrátt fyrir rough start í Leifsstöð. Við þurftum að bíða í laaaangri röð til að checka okkur inn og mín kona var eitthvað illa fyrirkölluð og var alveg snælduvitlaus. Ekki gerði það betra þegar bílstóllinn hennar var tekinn frá okkur og sendur inn. Þegar við fórum í gegnum öryggishliðið byrjaði svo önnur aría en þá kom öryggisvörður og tók kerruna við hávær mótmæli. Það bjargaði nú eiginlega aðstæðunum þar að Maja frænka varð að fara úr stígvélunum og varð daman svo hissa að hún talaði um það alla leiðina til Noregs Eftir trópí og góðgæti á kaffiteríunni í Leifsstöð tók hún gleði sína á ný og við vissum eiginlega bara ekkert meira af henni í ferðinni.

Það var eins og Saga Guðrún & Noregsbúarnir hefðu alltaf þekkst og umgengist hvort annað. Það var ekki að sjá að barnið hefði aldrei komið þarna áður og var hún alveg ótrúlega dugleg hvað þetta varðaði. Sambúðin við hundana gekk vonum framar og var áhuginn svo sannarlega úr báðum áttum, kannski ívið meira frá hendi barnsins þó.

Við brölluðum ýmislegt skemmtilegt. Fórum í nokkrar bæjarferðir og skoðuðum Bergen í sólinni og nutum lífsins. Saga Guðrún naut þess í botn að hafa Maju & Steinunni til að dekra við sig og borðaði ís í lítravís og eins borðaði hún heil ósköp af ferskum berjum á þessu rölti. Henni fannst æðislegt að rölta um út í náttúrunni á þunnum bómullarkjól þó að í fyrstu hafi henni fundist stórfurðulegt að vera ekki í neinum sokkabuxum Við fórum og skoðuðum lítinn lystigarð fullan af blómum sem átti aldeilis vel við mína konu, fórum á róló, skoðuðum tvær kirkjur og röltum um í Hauksdal sem er í útjaðri Bergen og kíktum á ströndina. Við eyddum líka miklum tíma liggjandi í leti heima sem var yndislegt og Saga lét Valdemar stjana við sig eins og sannri prinsessu sæmir. Hún var allavega með það vel á hreinu hvar var auðveldast að nálgast eitthvað gotterí.

Eins og Sögu Guðrúnu einni er lagið var hún alveg ótrúlega fyndin á stundum í ferðinni. Þessa dagana erum við að glíma við frekar mikla vatnshræðslu hjá ungfrúnni. Í litla lystigarðinum varð Steinunni frænku á að spyrja hvort að þær ættu að baða tásurnar í litlum læk og þá fauk aldeilis í mína. Svo fór hún frænka hennar líka að labba berfætt í grasinu við lítinn fögnuð og það hvein í minni konu á meðan hún þaut yfir grasið með skó frænku sinnar á meðan móðursystur hennar tvær gátu varla hamið sig fyrir hlátri.

Við fengum yndislegt veður og einn daginn röltum við Steina með Sögu á ströndina til að leyfa henni að sjá hvernig þetta gengi fyrir sig. Við bjuggumst nú ekki við að þetta yrði sérlega ánægjuleg lífsreynsla fyrir hana en áttum nú ekki von á að barnið yrði jafn miður sín og raunin varð! Hún eiginlega bara lamaðist af hræðslu og undrun - þarna var fullt af fólki út í vatninu - fólk gekk berfætt bæði í sandi og grasi og hún var alveg stjörf. Ég gerði heiðarlegar tilraunir til að fá hana til að moka og koma í vatnið en ekkert gekk. Það þarf varla að taka fram að þetta varð stutt stopp og farið í göngutúr í Blomsterdalen í staðinn - þar sem ekkert var vatnið og allir í skóm.

Daginn eftir fórum við í gönguferð í Hauksdal. Þar voru allir tvífætlingarnir ásamt ferfætlingunum - þar sem við röltum í brjáluðum hita upp eftir dalnum meðfram ánni. Leikurinn var gerður svo að hundarnir fengju að synda aðeins og leika sér. Það var steikjandi hiti og stelpunni líkaði vel að rölta þarna upp eftir ánni þó að henni hafi ekki fundist jafn sniðugt að hundarnir færu út í vatnið og hvað þá Valdemar. Ég reyndi töluvert að fá hana af sjálfsdáðum út í vatnið en ekkert gekk svo ég tók hana bara í fangið og óð með hana út í. Henni fannst það alls ekki slæmt - við spörkuðum vatninu í áttina að hundunum og æstum þá upp úr öllu valdi sem kveikti áhugann hjá Sögu. Steina frænka dobblaði hana svo til að vaða út í vatnið - í skónum og öllu - en það endaði nú ekki sérlega vel! Saga Guðrún steyptist á bossann í tilraun til að sparka vatninu fyrir Garp og fannst þetta frekar erfið lífsreynsla. Ég varð að sjálfsögðu að taka hana úr öllu en það vildi svo til að hún gat farið í buffið yfir sig - til að hlífa henni aðeins við glampandi sólinni sem gerði sitt besta til að grilla okkur. Þegar hún var búin að jafna sig eftir fallið í vatnið fannst henni ægilegt sport að labba um berrössuð - þurfti alltaf að stoppa á tveggja skrefa fresti til að athuga þetta undur og þetta bjargaði sko alveg ferðinni Í albúmi ferðarinnar eru óborganlegar myndir af þessu atviki.

Heimferðin gekk fínt jafnvel þó að daman hafi ekki verið jafn stillt og góð og á útleiðinni. Hún var sæl og glöð að hitta pabbann sinn … og bílinn sinn og fannst ekkert rosalega leiðinlegt að komast í dótið sitt. Fljótega eftir heimkomu fór hún að spyrja eftir ömmu og afa og er búin að heilsa upp á þau, fara í afmæli og slappa af með mömmu sinni frá því að við komum heim. Þetta var æðisleg ferð og á endasprettinum athuguðum við meira að segja hvort við gætum ekki verið bara lengur. Það gekk ekki upp en næst stoppum við pottþétt mun lengur en þetta Við erum líka duglegar við að tala um Steinu&co úti og fljótlega ætla ég að gera lítið myndaalbúm handa henni svo hún geti skoðað og rifjað upp ferðina og fjarlæga ættingja

Já við mæðgurnar eru komnar heim eftir yndislega dvöl í Noregi! Það var nú ósköp gott að koma heim og knúsa og kyssa pabbann eftir fjarveruna og Saga var yfir sig ánægð með að hafa endurheimt hann og eins litla Rauð (bíllinn). Noregsbúanna okkar er samt sárt saknað og það verður frábært að koma til þeirra næst, því þá fer pabbinn með.

Ég skrifa ferðasöguna fljótlega hérna inn og reyni að setja inn myndir í kvöld - ég veit að það bíða margir spenntir. Nennan er samt í sögulegu lágmarki svo ég sé til Við mæðgurnar erum jú ennþá í sumarfríi og ætlum að bralla ýmislegt saman næstu daga. Stungum sól og hita niður í ferðatöskuna frá Bergen og stefnum á að taka það upp fljótlega

Já það er svo sannarlega yndislegt hér í Bergen. Við höfum það ótrúlega gott og veðrið er búið að vera með besta móti. Í dag gleymdi ég mér svo í sólinni að það stórsér á mér. Sagan var að sjálfsögðu smurð í bak og fyrir og sér ekki á henni.
Við erum búnar að hafa það æðislegt. Búnar að borða ís og fersk ber í tonnatali og Saga Guðrún er sérlega hrifin af kirsuberjum eða moreller eins og það heitir á norskunni. Hindber finnst henni líka algjört nammi. Maja frænka fór heim í gær og þegar við gengum á Sögu og spurðum hvar Maja væri kom bara eitt stórt: “o ó” og var hún mjög hissa. Við höfum nú ekki gert mikið af okkur síðan síðast, bara legið í leti og notið lífsins. Hún er orðin algjör hundastelpa og ég hálfvorkenni hundunum að þurfa að umbera lætin í henni:D Ég er búin að vera dugleg með myndavélina og reyni að setja inn myndir úr ferðalaginu þegar verður farið að hægjast um helgina. Við Saga ætlum á morgun að kíkja í Lagunen sem er verslunarmiðstöð hérna rétt hjá og versla aðeins og kíkja síðan með litla “vatnsköttinn” á ströndina þegar Steina kemur heim. Svona helst til þess að geta sagt að Saga hafi komið á ströndina
Jæja - ætla að láta þetta heita gott í bili…

Við erum búnar að hafa það ótrúlega gott hér í Bergen. Saga Guðrún leikur á alls oddi og hefur verið ótrúlega dugleg og skemmtileg - jafnvel þótt að hún sé nær svefnvana. Hún náði nú reyndar að sofa í 13 tíma í nótt og er í banastuði núna.
Við erum búnar að fara niður í bæ 2x og í gær fórum við líka Toys ‘R us við mikinn fögnuð dömunnar. Verðlagið er samt mjög svipað og heima en við fundum samt gott tilboð og fékk stóran Fisher Price kassa. Fyrsta daginn rigndi á okkur en í gær var mjög gott veður - og í dag stefnir eiginlega í betra veður en í gær. Við höfum verið í rólegheitunum bara í morgun og daman skottast um út á palli og leikið sér.
Það er ekki að sjá að daman sé að hitta Valdemar og ferfætlingana í fyrsta sinn og Steinu frænku í fjórða sinn - það er eins og hún hafi aldrei gert annað en að vera prinsessan hér á bænum!
Við ætlum eitthvað á röltið í blíðunni hér í dag og ég giska á að daman eigi eftir að hesthúsa nokkrum ísum í viðbót við þann sem hún fékk í eftirrétt í morgun. Það eru ófáir ísarnir sem hún er búin að sporðrenna. Síðan hefur hún drukkið endalaust mikið af vatni með einhverju berjabragði sem er ægilega gott og með sérlega handhægum stút fyrir stúlkur eins og Sögu. Við mæðgurnar höfum engin sérstök plön fyrir næstu viku, ég er að spá í að fara með hana þó á Aquarium-ið sem gæti verið skemmtileg upplifun fyrir svona títlur. Aðalmálið er þó að njóta lífsins og liggja í leti með góðu fólki og yndislegum hundum
Þó að Saga hafi það mjög gott þá skyggir pínulítið á gleðina þegar daman er orðin þreytt þá saknar hún pabba síns. Í gærkvöldi í matartímanum fór hún að hvísla að mér að hún vildi fara í bílinn og fljúga. Þegar ég gekk á hana þá vildi hún fljúga heim til pabba. Það var svo afar sæl lítil Saga sem fékk að horfa og hlusta á pabba sinn í webcamerunni í gærkvöldi en að sama skapi leið lítil Saga þegar búið að var að slökkva. Hún sofnaði þó fljótt og hefur bara einu sinni minnst á hann síðan. Hún virðist sakna hans mest þegar við sitjum öll saman - eins og eitthvað vanti. Enda væri ótrúlega gaman að hafa hann hérna hjá okkur
En jæja - við stelpurnar ætlum að tygja okkur af stað … þið fáið áreiðanlega fleiri fréttir þegar líður á vikuna. Skiljiði nú endilega eftir comment fyrir okkur ferðalangana

Saga Guðrún er bara töluvert spennt útaf yfirvofandi flugferð. Hún er hörð á því að hún ætli í allar flugvélarnar sem hún heyrir í eða sér bregða fyrir auk þess sem hún er viss um að bæði ég og pabbi hennar ætlum með. Hún samþykkir alveg að Maja frænka ætli með en er ekki lengi að bæta við “og pabbi minn?” þegar það mál hefur verið rétt. Daman er farin að herða sig aðeins í mömmusýkinni aftur og vonandi lagast það þegar hún verður frá pabba sínum í svona langan tíma.
Við erum búin að skoða myndir af öllum Noregsbúunum okkar. Garpur er jú hundur og segir voff en hún er eitthvað efins með hana Frigg. Stundum er hún hundur og segir voff en aðra stundina er hún ljón með tilheyrandi hljóðum. Hundinn Frigg er hún fús til að hitta en sömu sögu er ekki að segja um Ljónið Frigg. Hún er ákveðin í því að hún ætlar að lúlla með Garpi eftir að hafa skoðað myndir af mér&Garpi síðan 2004. Hún þekkir nú frænku sína strax og fagnar ákaft - enda er hún viss um að vinsældirnar fylgi nafninu. Það gengur ekki eins vel með Valdemar því hún er þess fullviss að þar sé pabbi sinn á ferðinni.

Fyrsti dagurinn okkar í sumarfríi var annars í dag. Við stússuðumst heil ósköp með Ólöfu frænku og náðum ágætis afköstum, fórum 2x í heimsókn í Kópavoginn, heimsóttum svo afa Adda, pabba og Guðrúnu öll í vinnuna auk þess sem við kíktum heim til Beintu Maríu. Það var frekar sæl lítil Saga Guðrún sem fór með mömmu sinni í bankann í dag og var leyst út með gjöfum. Georgs baukurinn vakti mikla lukku og var troðið í hann af mikill áfergju í dag þó að litlir puttar hafi stundum ruglast og stungið peningunum upp í sig. Öllu vinsælli var þó Latabæjarbolurinn sem hún fékk gefins og það skemmdi ekki fyrir að Ólöf frænka fékk eins bol! Á morgun ætlum við að rúnta um bæinn og stússast aðeins fyrir ferðalagið okkar og auðvitað pakka niður. Saga tók sér bessaleyfi að hjálpa til í Kópavoginum að þjappa í töskurnar með að setjast ofan í þær en þær eru á leið í sólina. Hún ætti því að vera í fínni æfingu á morgun þegar við pökkum saman enda bara gaman Svona frá og með kl.21 á morgun verð ég síðan ekki viðræðuhæf því þá verður stressið komið í hámark.

<

Við mæðgurnar ætlum að stinga af á næstu dögum. Við erum á leið til Bergen Norway ásamt Maju systur á miðvikudaginn næsta. Ég & Saga sætasta ætlum að stoppa í 9 daga en Maja systir í 5 daga. Það er mikil spenna í gangi og við tölum mikið um flugvélina, Steinu, Valdemar og hundana og erum svo að kíkja á myndir af liðinu og svona til að undirbúa Söguna. Heljarinnar batterí að fara svona út en það er sko vel þess virði … fátt annað sem kemst að hjá mér. Búin að þrælskipuleggja það sem þarf að pakka og þess háttar og því í góðum gír …
Ég er eiginlega ekki viðræðuhæf og nenni því engan veginn að tala um neitt annað svo hér set ég punktinn.

Um síðustu helgi stormaði fjölskyldan ásamt Steinunni&Halla í útilegu. Við fórum í Galtalæk og heppnaðist helgin mjög vel. Saga Guðrún var að vonum alsæl og fannst það eiginlega toppurinn að sofa á milli mömmu og Steinunnar Það var nú ekki margt gert samt sem áður annað en að liggja í grasinu og leika sér á róló, skruppum jú á Seljalandsfoss og í sund en það telst varla með. Sögu Guðrúnu fannst fossinn afar merkilegur og ægilega fyndið þegar hun grillti í pabba sinn og Halla bak við hann. Flugnaherinn var síðan það sem truflaði okkur mest og gerðumst við fjöldamorðingjar þessa helgi - flugnadráp teljast dráp.
Langamma Bogga og Amma Hoppa (Edda) áttu báðar afmæli í vikunni og hefur Saga verið mjög dugleg að syngja afmælissönginn í tilefni þess. Hún fór líka í kjötsúpuafmæli til ömmu Boggu og skemmti sér mjög vel. Plataði frænkur sínar til að snúast í kringum sig og kallaði svo alla ömmu og afa Svo átti Ólöf líka afmæli og við förum í afmælisveislu þar á morgun og án efa á daman eftir að skemmta sér hið besta.
Einhvers staðar hefur daman fengið vítamínssprautu í rassinn því hún talar meira og meira með hverri klukkustundinni. Setningarnar flæða út úr henni og hún er ekki mikið gefin fyrir þögnina. Vítamínssprautan virkaði á fleira því hún er alveg að reyna öll takmörk þessa dagana og hefur sjaldan verið ákveðnari (pent orðað). Hún elskar leikskólann sinn allltaf jafn mikið og það sem ég hef séð til hennar undanfarið er hún sama ráðskonan þar og heima hjá sér. Hún elskar líka að syngja og þar byrjaði eiginlega kjaftagangurinn því í langan tíma hefur hún verið mun duglegri við að syngja en að tala.