Saga Guðrún & Arney Vaka

Þetta er nú aldeilisbúin að vera viðburðarrík vika á bænum Saga Guðrún brallaði margt og mikið og er í flottu formi þessa dagana. Hún er að taka þvílíkt stökk í þroska að maður sér dagamun á henni. Heilu setningarnar farnar að flæða upp úr henni og hún er þvílíkt að víkka út skilninginn sinn.

Á fimmtudaginn fór hún á Brúðubílinn með leikskólanum. Henni fannst þetta ægilega skemmtilegt. Eins og með margar aðrar svona skemmtanir finnst henni nauðsynlegt að það sé söngur allan tímann til að halda athyglinni og heimtar bara meira þegar lögunum lýkur. Þetta var eftir hádegi og við vorum svo í kaffi á leikskólanum og hún harðneitaði að fara heim - þrátt fyrir átta tíma dag. Hún gæti vel hugsað sér að búa þarna. Við fórum síðan í Kópavoginn og þar skemmti hún sér frekar vel með pabba sínum og Mörtu frænku á trampólíninu. Hún er farin að tala annars vegar um ömmu&afa og hinsvegar ömmu hoppa Síðan finnst henni reyndar allt fullorðið fólk vera amma og afi þessa dagana.

Á föstudeginum var svo sumarhátíð á leikskólanum! Vegna veðurs varð þetta aðeins minna í sniðum en stefnt var að og megnið af hátíðinni var innan dyra. Saga Guðrún neitaði að leggja sig þann daginn og var því dálítið stuttur þráðurinn í minni konu. Hún skemmti sér vel í skrúðgöngunni sem var farin í kringum sandkassann en var ekki skemmt þegar við ætluðum að vera með í stórfiskaleik og mokaði restina af útiverunni. Skoppa og Skrýtla komu í heimsókn og henni fannst þær mjög spennandi en þær áttu fyrir hennar parta að syngja allan tímann. Hún vildi nú samt ekki fara of nálægt eins og sést í myndaalbúminu. Svo var pulsupartý inn á Hlíð sem hún var vitanlega ánægð með. Við fórum svo í mat til ömmu&afa eftir að hún hafði lagt sig mjög seint miðað við venjulega og var í banastuði hjá þeim. Hún hélt uppi skemmtiatriðunum, gekk í loftinu og fleira skemmtilegt
Í gær var svo auðvitað 17.júní takk fyrir! Dagurinn byrjaði á því að Tinna Mjöll kom í heimsókn til okkar og þær voru ægilega ánægðir með hvor aðra. Léku sér í tjaldinu með miklum látum og hlógu og skemmtu sér. Þær dönsuðu hér upp á borðum og voru rosalega góðar saman. Þær voru orðnar þreyttar og tættar í restina og slógust aðeins og Saga spilar sig alltaf voða saklausa í þessum efnum. Talaði um það sem eftir lifði dagsins að Tinna hefði meitt sig!
Eftir blundinn fórum við svo niður í bæ, kíktum á skemmtiatriðin á Arnarhóli þar sem daman dillaði sér og hló mikið. Síðan var ráðist í blöðrukaup og ekkert kom til greina annað en að kaupa Lala blöðru (Stubba blöðru). Hún hékk við einn básinn í hóp af öðrum blöðrum og átti það til að hverfa í rokinu á meðan við biðum í röð og heyrðist þá alltaf angistaróp frá minni konu. Hún var agalega ánægð og er enn með blöðruna sína og er búin að prófa að hoppa og sitja á henni og so far þá hefur hún ekki látið á sjá. Við röltum um bæinn og dagurinn hjá Sögu náði hápunkti sínum í Hljómskálagarðinum þar sem hún fékk að moka í sandkassa. Strætóferðirnar fannst henni óvenjuskemmtilegar en hingað til hefur hún verið fremur hrædd í þeim ferðum. Svo elduðum við með Steinunni og Halla og hún var alsæl með það eins og alltaf!

Í dag er svo bara rólegur sunnudagur. Þau feðginin og auðvitað nýja myndavélin fóru út á Múlaborg að leika og var mikið fjör og mikið tekið af myndum. Það er hálfgert rugl hversu mikið er tekið af myndum hérna á heimilinu þessa dagana og er framboðið í albúminu svolítið eftir því. Nú fer að styttast í sumarfrí hjá okkur mæðgunum og erum við opnar fyrir öllu. Til í allt ef einhver er með skemmtileg plön á þessum tíma

Þá eru saumarnir farnir og gekk bara vel. Barnið er samt búið að vera á hausnum síðan þetta var og er öll marin og blá en auðvitað bara í andlitinu svo marblettirnir fari nú ekki framhjá neinum! Við fórum í sumarbústað um helgina og á fyrsta klukkutímanum var hún búin að detta tvisvar á andlitið og svona hefur þetta verið - í leikskólanum í dag beit hún vel og vandlega í vörina á sér. Greinilega eitthvað svona klaufabárðaskeið í gangi hjá dömunni Undanfarið hefur Saga Guðrún eytt miklum tíma úti - er oft úti allan daginn á leikskólanum og þetta líkar minni konu vel Úthaldið er eftir því - ekki mjög mikið en hún er sæl og ánægð - sem er fyrir öllu.

Um helgina kíktum við á Maju & Binna og fjölskyldu í Brekkuskóg og höfðum það gott. Það var dekrað við dömuna og sérstaklega Iðunn sem fór með hana út þrisvar á dag Hún kíkti í heita pottinn en líkaði það ekki sérlega vel nema í andartak. Hún tók sig samt ótrúlega vel út i bleiku sundskýlunni með tweety kútana og henti sér alveg um í vatninu. En eftir þessa reynslu er alveg spurning hvort ég treysti mér með hana í sund en það verður bara að koma í ljós. Á laugardeginum eyddum við stærsta hluta dagsins í Slakka þar sem leiktækin félllu í góðan jarðveg en hún var nú frekar hrædd við dýrin. Hún prófaði nú samt að gefa kálfunum gras og sá þá drekka pela sem henni fannst mjög merkilegt, hún kíkt á kettina og fannst svínið alveg ágætt því það var í góðri fjarlægð. Eins og sannri hundastelpu sæmir fannst henni hvolparnir lang merkilegastir og var lítið hrædd við þá. Hún meira að segja skellti sér inn í girðinguna til þeirra og alles.
Saga Guðrún er búin að vera dálítið hissa á fjarveru pabba síns eftir að hann fór að vinna og er alveg pabbasjúk á daginn. Leitar að honum í hvert skipti sem við komum heim á erfiðustu dögunum grætur hún þegar hún finnur hann ekki. Í dag var hann svo lasinn heima og barnið búið að tönglast á “pabbi vinna” í allan dag :D Önnur manneskja sem hún sér ekki sólina fyrir er Steinunn því hún er með hana á heilanum. Ef síminn hringir þá er það Steinunn, ef dyrabjallan hringir þá er það Steinunn, ef ég skamma hana þá vill hún fá Steinunni og ef ég fer að tala um að gera hitt eða þetta vill hún alltaf að Steinunn sé með.

Við vorum að kaupa okkur nýja myndavél. Algjört tryllitæki og ætti nú að bætast töluvert í myndaalbúmið. Nú þegar kann ég meira á nýju vélina en þá gömlu sem er algjörlega að gefa upp öndina. Það er ekki alveg að ganga þegar myndefnið er 1 1/2 árs skotta að myndavélina sé fleiri fleiri sekúndur að taka myndina! Þá er momentið löngu farið!

Jæja þetta er nú alls ekki búin að vera skemmtilegasta helgin hjá mér Reyndar skemmti ég mér rosalega vel á laugardaginn - var með mömmu, pabba, Steinunni & Halla, hitti Önnu vinkonu mína & co, ömmu&afa og langömmurnar mínar og svo fórum við líka út á Álftanes svo það var fínasti dagur. Í gær fékk ég svo gubbupest og var hræðilega lítil og leið. Vildi mest bara kúra og knúsast með mömmslunni og pabbanum enda var sko algjör letidagur!
Í dag vaknaði ég svo sprautuhress - svaf reyndar næstum til 10 eins og undanfarna morgna mömmu og pabba til mikillar ánægju. Síðan var ég á fullu að leika mér og sprella og hafa það gaman og það endaði ekki betur en það að ég datt á stofuborðið þegar ég ætlaði að fara að kveðja hana mömmu mína. Æææææi það var svo vont og ég var alveg agalega reið og það blæddi heil ósköp. Mamma reyndi að róa mig en það var allt fullt af blóði og ég fann svo rosalega til aðég var alveg brjáluð. Ég var með skurð á vörinni og mamma hringdi í afa til að fá hann til að koma og kíkja og meta hvort við þyrftum að fara á slysó. En afi náði ekki að komast því þá voru mamma og pabbi búin að skipta um skoðun og ruku með mig á slysó því þau héldu að ég hefði bitið í gegnum vörina. Afi varð samt á undan okkur uppeftir og beið eftir okkur. Ég stóð mig ótrúlega vel í að berjast gegn hjúkrunarkonunni og lækninum sem skoðuðu mig og það þurfti þrjá til að halda þessum litla kropp. Mömmu og pabba fannst þetta nú frekar erfitt að horfa á og mamma neitaði að láta senda sig út á meðan þau saumuðu sárið saman! Það þurfti nú bara eitt spor en það er alveg nóg í svona litla vör! Í verðlaun fékk svo appelsínugulan broskalla bolta sem er ægilega skemmtilegur. Ég var ósköp fegin svo að hitta afa á biðstofunni og hann bauð okkur heim til ömmu þar sem ég fékk líka ís í verðlaun! Það var rosa gott að fá ís á vörina til að kæla bólguna en ég var svo þreytt að við fórum eiginlega bara strax heim að sofa. Nú er ég sofandi með bólgna og samansaumaða vör og mamma og pabbi að reyna að jafna sig eftir sjokkið. Ég á að hafa saumana í eina viku og þá eigum við að láta taka þá bara á heilsugæslunni þeas ef ég verð ekki búin að bíta þá úr.
Mamma er búin að setja inn myndir af áverkunum sérstaklega fyrir Steinu frænku sem hringdi akkúrat í okkur á meðan við biðum eftir lækninum. En það koma án efa fleiri myndir þegar ég verð vöknuð!
Hvernig væri nú að senda hinni stórslösuðu mér kveðjur? Það væri nú ósköp skemmtilegt að sjá hverjir hugsa til mín!!

Ykkar Saga Guðrún