Saga Guðrún & Arney Vaka

ár og dagar líða…nú er komið hrímkalt haust… Nei nei … ég á bara alltaf í sömu vandræðunum með titlana á þessar blessuðu færslur.
Nú er smá veikindahrina að herja á hana dóttur mína, hún er stútfull af kvefi og hósta og búin að vera með hita með því. Það virðist vera þannig að þegar hún veikist einu sinni þá nær hún sér ekki upp úr pakkanum í soldinn tíma. A.m.k. hefur það sýnt sig núna eftir áramótin. Hún er líka að sofa rosalega mikið, leggur sig yfirleitt í alveg 4 tíma á daginn sem er soldið mikið fyrir svona stóra stelpu.
Við erum bara svona hægt og hægt að reyna að koma okkur í sumarfílinginn - gengur illa bæði út af veikindum og veðráttu en erum þeim mun duglegri að leika okkur inni. Við erum búnar að setja stól á hjólið mitt og fara í nokkra stutta hjólatúra en ætlum svo að hjóla í vinnuna þegar að skottan verður orðin hressari. Sögu Guðrúnu finnst það ægilega gaman en treystir pabba sínum heldur betur en mér til að hjóla með sig. Hún fékk bleikan kanínuhjálm og er mjög hrifin af honum. Hún fékk líka buff og sólgleraugu og finnst hún bara töff - sem hún að sjálfsögðu er.
Annars er allt við það sama hjá okkur. Pabbinn á bænum farinn að vinna á fullu og líkar það bara mjög vel. Gleymdi þó bílnum í vinnunni á föstudaginn sem var alveg hilarious verð ég að segja Núna er Þyrnirós sofandi á sínu græna eyra og við að hugsa um að fara í hjólatúr þegar hún rumskar. Kemur bara í ljós hvenær hún vaknar því Bónus bíður líka spenntur eftir okkur

Saga Sæta fór í 18 mánaða skoðun í gær - rétt áður en hún verðru 19 mánaða. Daman var heldur betur flott - stendur mjög vel í öllum þroska en við þurfum nú enga skoðun til að segja okkur það.
Hún kom síðan vel á óvart - náði 10 kg og 50 gr betur en það. Það eru ekki nema tveir mánuðir síðan hún mældist 9.2 og eftir það komu páskarnir með tilheyrandi veikindum og svelti og svona þannig að þetta var afar fínar tölur Hún er þó ekki nema 80 cm löng - lítil stubba og höfuðummálið var 49 cm. Það var ekki sprauta í þetta skiptið þar sem hún er ennþá mjög kvefuð eftir veikindi síðustu viku. Fer 20.júní í sprautuna…
Bara svona pínulítið update héðan

Við fórum í sveitaferð með Klömbrum í gær. Sögu Guðrúnu leist ekki sérlega vel á rútuferðina á leiðinni uppeftir enda ekki alveg í sínu besta formi. Var soldið lasin á þriðjudeginum en við ákváðum að skella okkur nú samt í sveitina - sem reyndist rétt ákvörðun því hún skemmti sér æðislega vel.
Við byrjuðum á því að skoða dýrin sem skv. Sögu sögðu öll voff nema litlu sætu kettlingarnir. Hún var nú ekkert á því að vera að koma of nálægt þessum dýrum og stóð ekki á sama þegar við vorum að skoða kálfana sem vildu sleikja okkur. Þegar við svo færðum okkur yfir á leikvöllinn kom annað hljóð í skrokkinn og hún skemmti sér vel í sandkassanum. Eins og sannri prinsessu sæmir lagði hún ekki í brekkur né aðrar hindranir án þess að hafa aðstoð ólíkt við félaga hennar af Hlíð þau Sigríði Björgu og Tuma sem hlupu um svæðið eins og fjallageitur. Já hún Saga er með það á hreinu að það borgar sig að fara varlega og láta þjóna sér. Hún er náttúrulega á eina æviskeiðinu þar sem þessi þjónusta þykir sjálfsögð Hún borðaði grillaða pylsu og þambaði mjólk með bestu lyst og kunni sko alveg að fara í rútu þegar við fórum heim. Þegar hún svo vaknaði eftir lúrinn var hún komin með háan hita og var því lasin heima með pabba í dag. Því miður því tvær af kennurunum á deildinni hennar eru að hætta núna og starfsdagur á morgun. Hún verður með pabba fyrir hádegi og svo er ekki útséð með hvað verður seinnipartinn því pabbi á að byrja í nýju vinnunni og ég ætlaði að reyna að ná sem mestu af starfsdeginum og fer síðan í jarðaför. Ef hún verður hress sem mér finnst líklegt þá ætlar hún að eyða deginum með Tinnu Mjöll stuðbolta.

Annars er ekkert spennandi í fréttum. Við erum ekki enn búnar að komast í sund þar sem hún er svo voðalega kvefuð og já auðvitað lasin núna en stefnum ennþá á það. Svo erum við komnar með stól á hjólið og bíðum eftir því að geta prófað það - eftir að skella honum á og kaupa hjálm. Litli söngfuglinn er alltaf að læra meira og syngur núna “gulraur”, óskaSTEINA og prumpulagið, bílalagið og nokkur fleiri. Svo vill hún aðallega vera úti og lita Búin að eyða stórum hluta dagsins í að ganga um gólf í þunnum bómullarkjól og stígvélum í von um að komast út. Eitt sem hún klikkar aldrei á þegar út er farið og það er að hafa húfu

Saga Guðrún er búin að njóta veðurblíðunnar í botn undanfarið Útistelpan sem hún er þá er hún auðvitað alsæl með þetta fyrirkomulag. Á laugardaginn var opið hús á leikskólanum hjá okkur og hún lék sér úti meira og minna allan tímann. Sýndi pabba sínum hvað hún er sjóuð leikskólastelpa og svei mér þá ef pabbi hennar vanmat hana ekki bara svolítið í kastalanum og þannig
Á sunnudaginn tókum við daginn snemma og fórum í Húsdýragarðinn. Samkvæmt henni voru þetta allt saman hundar í mismunandi stærðum og gerðum nema sumir gáfu frá sér gaggalagú! Hún lék sér líka heilmikið í leiktækjunum og naut sín í botn. Hún fór svo til ömmu og afa á Birkimelinn eftir blundinn og hjálpaði þeim að elda matinn og svona.

Nú er síðasta prófið hjá mér á morgun og stelpan búin að vera í útlegð. Amma Edda sótti hana á leikskólann í gær og afi Addi í dag. Hún er nú bara mjög ánægð með þetta fyrirkomulag og finnst þetta ágætis tilbreyting! Á morgun hinsvegar þegar prófið er að baki og næstu daga, vikur og mánuði ætlum við að vera duglegar að eyða tímanum saman og er ýmislegt á prjónunum - t.d. sundferðir, fleiri húsdýragarðsferðir, verslunarferð fyrir ýmsa sumarhluti sem hana vantar og auðvitað nóg af knúsi og kossum. Við ætlum að fá lánað þríhjólið þeirra Iðunnar og Ara og æfa stelpuna á því og svo höfum við líka verið að gæla við að fá stól á hjólið mitt og leggja bílnum í sumar.

Nú er ég að að verða búin að ljúka markmiðinu fyrir líffæra og lífeðlisfræðipróf morgundagsins og bíð eftir að fá skottuna mína heim, knúsa hana í ræmur og leggja svo lokahönd á undirbúninginn þegar hún er búin í baði og komin í draumalandið.

Já við erum byrjuð að huga að koppaþjálfun - reyndar töluvert langt síðan og Saga Guðrún er dugleg að láta vita þegar hún þarf að gera þarfir sínar en hefur ekki fengist til þess hingað til að fara hvorki á kopp né klósett. Í gærkvöldi varð þó breyting á því hún arkaði sjálf inn á baðherbergi og náði í koppinn, sat svo á honum góða stund og skoðaði bók. Þessi seta bar engan árangur en þetta er allt á réttri leið

Það er sko aldeilis nóg að gera á bænum þessa dagana! Foreldrarnir í prófum og stelpurófan búin að vera á þeytingi síðan um helgina! Hún tekur þessu ótrúlega vel og nýtur þess bara að vera miðpunktur athyglinnar! Í dag var hún á leikskólanum til 16 og kom svo bara heim og ég held að við höfum öll verið ósköp ánægð með það fyrirkomulag! Við erum varla búin að sjá hana nema yfir blánóttina síðan á laugardag! Hún fór í Kópavoginn á sunnudaginn og eyddi síðan mánudeginum á Álftanesinu. Í gær var svo langur dagur á leikskólanum og amma Edda fór að sækja hana og hún dúllaðist aftur í Kópavoginum.

Saga Guðrún sæta mús er svo ótrúlega dugleg. Hún er orðin svo rosalega dugleg að syngja! Hún syngur Prumpulagið, Litalagið & Fingralagið. Eða svona sönglar með og að sjálfsögðu tekur hún líka létt spor með ef vel liggur á henni! Henni finnst líka svo æðislega gaman að lita og teikna. Hún vill teikna “omma tik” og bíl til skiptis. Síðan í dag prentuðum við út mynd af hinum sívinsælu stubbum og hún dundaði heillengi við að “lita” þá. Hún er ótrúlega dugleg við að teikna hringi - og það er fátt annað sem hún teiknar.
Einhverra hluta vegna er hún búin að spyrja stanslaust eftir afa sínum síðan hún kom úr leikskólanum. Það var jarðaför í kirkjunni og mig grunar helst að hún hafi séð einhvern þar sem líktist afa hennar (eða ömmu því hún er jú líka kölluð afi). Við hringdum svo í þau áðan og hún spjallaði við ömmu Mónu alsæl Það er nú líka ekki oft sem hún hittir þau ekki vikulega svo kannski er hún bara farin að sakna þeirra Maður veit sko ekki hvað á sér stað í kollinum á henni
Ef Saga Guðrún fengi að ráða þá væri hún úti allan daginn. Hún hefur verið mikið úti undanfarið í allskonar veðrum og grenjar alltaf þegar hún kemur inn. Róló og göngutúrar eru það skemmtilegasta sem hún veit - finnst æði að moka, róla og renna og er alltaf að verða duglegri og duglegri við að bjarga sér. Hún meira að segja stendur stundum upp sjálf þegar hún er ekki ofdúðuð