Saga Guðrún & Arney Vaka

Saga Guðrún er alveg upp á sitt besta þessa dagana. Hún er að þroskast svo ótrúlega hratt og það er alveg ótrúlega gaman að fylgjast með henni. Hún blaðrar út í eitt og er orðin svo hrikalega grettin að það hálfa væri nóg. Svipbrigðin eru alveg ótrúleg. Í dag fórum við í Bónus og barnið lét bara eins og það fengi aldrei að borða heima hjá sér og æpti “namminammi” á allt sem var inni í búðinni og var svo voðalega hissa á að við vildum ekki kaupa allt þetta nammi
Það var sko nóg að gera um helgina. Á laugardeginum fórum við að horfa á Iðunni&Ara keppa upp í Mosó og tókum Ólöfu með okkur. Saga Guðrún er að verða þaulvön að fylgjast með og finnst þetta mjög gaman. Í hálftómum íþróttasal er nóg pláss til að sprella, fullt af athygli og auk þess er Maja frænka konan með matinn - ostaslaufur, ávaxtasafa og niðurskorna ávexti og jú auðvitað vatnsbrúsa. Hvað meira er hægt að fara fram á? Eftir mótið fór hún svo í heimsókn til Steinunnar og Halla sem hún hafði ekki séð síðan fyrir páska og henni varð svo mikið um að hún klappaði nú bara af miklum krafti þegar hún nálgaðist húsið.

Í gær var svo fermingarveisla hjá Mörtu frænku. Afi Addi kom og passaði skvísuna á meðan við fórum í athöfnina og hún var æðislega kát með það. Hún er mikil afastelpa og notar orðið afi yfir bæði afa Adda og ömmu Mónu. Daman mætti svo ósofin í veisluna og var alveg í essinu sínu - heillaði flesta upp úr skónum og naut sín í botn. Í veisunni var ferfætt frænka sem hún var frekar hirfin af - hundur í viðráðanlegri stærð var eitthvað sem hún hefur ekki kynnst áður. Síðan var auðvitað Kristjana frænka líka - en hún alveg hreint dýrkar hana! Þegar veislan var búin var Kristjana að sprella eitthvað inni í salnum og stóð á höndum og svona - og prinsessan gerði sitt besta til að herma eftir og klappaði heilmikið fyrir fimleikaafrekum sínum. Svo brunuðum við í Kópavoginn og fylgdumst með gjafaflóðinu og það var frekar þreytt Saga Guðrún sem sofnaði um ellefu leytið í gærkvöldi. Það eru myndir í albúminu og aldrei að vita nema við bætum við þegar við fáum einhverjar Steinamyndir
Núna er að fara í hönd prófalestur og verkefnaskil hjá okkur foreldrunum og ég er búin að reyna að semja við skvísuna mína að vera stillt og prúð og alls ekki verða veik. Hvað verður kemur svo bara í ljós - stórfjölskyldan verður þá bara kölluð út ef hún ætlar að taka upp á einhverri vitleysu! Við erum líka að láta okkur dreyma um sumarfrí í Norge í sumar sem ætti að koma í ljós á næstu dögum :D

Saga Guðrún er að verða alveg eins og hún á að sér. Hún var töluvert mikið eftir sig á sunnudaginn en sjálfri sér lík í gær. Þegar líða tók á daginn þá var hún þó orðin dálítið þreytt og stuttur þráðurinn en í dag hefur hún verið hress. Hún fór á leikskólann í morgun og lék sér úti mestan hluta morgunsins. Svo kom hún heim og fékk sér blund og þegar hún vaknaði var Darri Jökull mættur í pössun og við drifum þau út í garð að leika. Stuttu seinna bættist Tinna Mjöll í hópinn og það var ansi gaman að þeim! Saga&Tinna eru orðnar bestu vinkonur - leika sér saman aðra stundina en slást þá næstu. Darra leist hinsvegar ekkert voða vel á þessar skrýtnu stelpur og var hrifnastur af Óla.
Saga Guðrún fékk gefins páskaegg í ár en fékk ekki að borða það. En frá okkur fékk hún bollastell sem hefur vakið mikla lukku Páskaeggið hennar er samt enn óopnað og bíður þess að hún verði nógu hress í myndatöku! Myndirnar af páskadegi eru nú ekki mjög hátíðlegar þó þær séu voðalega sætar
Á morgun flytjum við svo aftur heim - því miður - því hér er æðislegt að vera. Saga elskar að leika á pallinum og tekur svo strikið út á róló þegar hún er komin með nóg af garðinum Ekki næstum því jafn gaman að vera lítill í Fellsmúlanum og hér Svo eru auðvitað styttra í leikfélagana héðan - spurning hvort maður geti rekið Maju&co í sumardvöl erlendis

Þetta hefur verið með eindæmum lítið skemmtilegt páskafrí. Saga Guðrún var með hálsbólgu á fimmtudaginn og á föstudeginum var það orðið að sveppasýkingu í munninum en í gær, laugardag enduðum við niður á bráðamóttöku barna á landspítalanum þar sem blóðprufur leiddu í ljós að barnið var bara með smá flensu og slæmt munnangur sem var búið að leiða til þess að hún var orðin of þurr. Hún þurfti að fá vökva í æð og við eyddum tæpum sex klukkustundum þarna á bráðamóttökunni og hún Saga mín var sko ekki slappari en það að hún gólaði á konuna í móttökunni og að sjálfsögðu lét hún lækna og sjúkraliða heyra það líka!! Þeim fannst það nú reyndar mjög gott merki bara En í morgun fékk hún sér jógúrt að borða og borðaði svo aftur jógúrt, svala og pínu brauð í hádeginu og er að verða sjálfri sér lík sem betur fer. Hefur þess á milli þó bara sofið og er þá vonandi bara að vinna á flensunni og stuðla að því að munnangrið grói en það er ósköp stuttur í henni þráðurinn.
Stefnan er þó að sjálfsögðu sett á það að mæta hress og kát á leikskólann á þriðjudaginn og reyna þá bara að njóta sumardagsins fyrsta í botn fyrst páskafríið er búið að fara svona!

Saga Guðrún er ennþá lasin. Ælupestin er þó búin að yfirgefa hana en í gær var hún með háan hita og bullandi hálsbólgu og vildi ekkert setja ofan í sig. Það er þó allt á réttri leið - hún er farin að drekka aðeins þó að hún vilji enn ekki borða og sefur alveg út í eitt. Hitinn er líka orðin lægri og maður sér eitt og eitt bros. Aðallega er hún þó bara ósköp lítil og léleg litla músin. Við erum með matarboð á eftir og vonandi verður hún sæmilega viðræðuhæf þá, þegar amma og afi og langömmurnar koma.
Þetta frí verður sennilega í rólegri kantinum en það er nú bara ágætt Miðað við í fyrra þegar það vorut vær veislur á dag alla páskana

Við erum búin að hafa það alveg ofsalega gott hérna í útlegðinni. Það er æðislegt að fara út hérna í hverfinu og við erum m.a. búin að fara í fjöruferð sem Sögu Guðrúnu sem henni fannst ekki neitt lítið gaman. Þegar hún er á annað borð komin út þá vill hún helst alls ekki fara inn aftur og nýtur sín í botn úti. Hún er þó svo mikil pempía að hún þolir ekki að koma við gras, stétt, sand, mold eða möl og ber aldrei fyrir sig hendurnar. Auk þess leggur hún aldrei í að ganga á svæði þar sem eru miklar misfellur. Ef hún svo dettur þá þýðir ekkert að beita þrjóskunni á hana því hún er þrjóskari en allt - og liggur þess vegna í langan tíma og bíður eftir að sér verði bjargað. Í gær fékk hún svo væna byltu niður eina tröppu þegar hún var á leiðinni út í garð á Birkimelnum. Afraksturinn stóð ekki á sér - stokkbólgin vör.
Á páskavinafundi í leikskólanum í dag tók ég svo eftir því hvað hún leit illa út litla skottið. Fyrst hélt ég að hún væri bara þreytt - en áttaði mig um leið og hún kom í fangið á mér að greyið litla væri að verða lasið. Það stóð heima - hún borðaði ágætlega í leikskólanum en svaf svo bara örstutt þegar við komum heim, vildi ekkert borða og kastaði síðan upp. Eftir það var hún bara með öllu ómöguleg - var ennþá meira mömmusjúk en vanaleg, lagði sig aftur og vældi og vældi. Hún er full af kvefi og alveg raddlaus og eiginlega bara alveg voðalega lasin. Hún er þó hitalaus en samt sem áður hefur hún ekki verið svona aum áður - það er varla að hún orki að halda augunum opnum! Við vonum þó að þetta gangi fljótt yfir sem er að hrjá skottuna og hún nái að njóta páskafrísins með okkur

Á mánudaginn fór skvísa skvísanna í ofnæmispróf. Það gekk nú alveg ágætlega, hún svaraði a.m.k. engu á prófinu en við fengum ýmis góð ráð varðandi exemið. Hún er semsagt með barnaexem - sem er mjög dreift um allan kroppinn en sem betur fer ekki mjög slæmt. Við smyrjum hana bara vel og vandlega í bili en svo þegar það er komin reynsla á hvernig hún verður þá ætlum við að prófa að taka mjólkina út hjá henni. Saga Guðrún var ekki allskostar ánægð með þetta - og ég var svo sem ekkert hrifin af því að halda henni á meðan hún var stungin tíu sinnum í handlegginn. En svona er þetta og gott að vera búin að ljúka þessu af. Læknirinn talaði líka um að það væru svona 50% líkur á að hún fengi astma og bað mig um að fylgjast vel með því - en hversu vel hún brást við lyfjunum þegar hún fékk þau bendi frekar til þess að hún fái hann heldur en hitt. En það verður tíminn bara að leiða í ljós!
Í dag fórum við foreldrarnir svo í foreldraviðtal á leikskólanum og það gekk voða vel. Hún er alltaf glöð og ánægð og líður vel þar - nema náttúrulega þegar hún er orðin rosalega þreytt! Hún er bara voðalega dugleg og ekkert kvartað eða klagað! Á leikskólanum er rosalega sjúskuð monsa sem Saga er löngu búin að taka ástfóstri við og er alveg haldreipið hennar. Svo um daginn fannst önnur nýrri monsa sem kennurunum leist nú vel á að gæti komið svona til með að vera vinsæl með hinni en mín kona vill ekki sjá hana! Hin monsan er alveg nr.1,2 og 3 Já það er gott að vera sérvitur lítil stelpa!

Annars er lítið í fréttum. Við erum núna að sjá um ferfættan fósturson og það gengur bara mjög vel. Saga og hann eru orðnir fínir vinir og ætlum við að hafa það notalegt saman um páskana.

Endilega skrifið nú í gestabókina!!!