Saga Guðrún & Arney Vaka

Svona í tilefni þess hvað allar færslur í langan tíma hafa snúist um veikindi þá ákváðum við að setja inn eina færslu núna.
Þessi dagur fór nú samt ekki vel af stað. Saga borðaði hafragraut með rjóma í morgunmatinn, fékk með því lýsi, achidophilus og sýklalyf og þessi rosalegi kokteill fór eitthvað illa í magann á henni. Ég þurfti að skipta um föt á henni eftir morgunmatinn því hún subbaði hafragraut út um allt og um leið og ég var búin að skipta á henni gubbaði hún kokteilnum í hóstakasti svo við vorum alltof seinar af stað á leikskólann! Saga er svolítið gjörn á að kasta upp þegar hún hóstar svo við krossuðum bara putta og vonuðum að hún væri ekki komin með gubbupest!
Það reyndist líka rétt og hún átti ljúfan dag á leikskólann - var að föndra eitthvað páskaföndur! Síðan þegar pabbi var kominn heim og Saga búin að lúlla sér þá drifum við okkur út á róló sem Sögu fannst ekki leiðinlegt. Hún mokaði, rólaði og renndi sér og fannst voða gaman. Eftir góða stund á róló var hún dregin öskrandi í burtu því hún fær jú aldrei nóg. Við mútuðum henni svo með viðkomu í Kjöthöllinni þar sem við keyptum banana. Það er alsæl og uppgefin stelpa sem liggru núna hérna í sófanum við hliðina á mér og horfir á Birtu&Bárð á meðan hún bíður eftir kjötbollunum sem pabbinn er að malla!

Ja hérna hér! Núna náði stelpuskottan bara fjórum dögum í sæmilegu standi Við fórum til barnalæknis í dag og hún er frekar slæma eyrnabólgu. Það kom eiginlega pínulítið á óvart þar sem hitinn í seinustu viku stoppaði stutt og hún bara nokkuð hress. Við fórum hinsvegar til læknisins út af langvarandi niðurgangi sem var að plaga skottuna. Eyrnabólgan gæti verið að orsaka niðurganginn en það gæti líka verið fituskortur og því er það sýkalyf, rjómi, meiri mjólkurmatur, meiri acidophilus og fullt fullt af olíum og kremum á skaðbrunninn bossann næstu daga!

…Saga Guðrún var frísk í viku. Núna er hún aftur orðin veik litla rófan - var samt alveg eldhress í dag fyrir utan smá pirring í hádeginu á leikskólanum. Við fórum svo til ömmu og afa og lékum okkur aðeins í garðinum og hjálpuðum svo til við eldamennskuna og fengum að borða. Þegar við svo komum heim fannst pabba hennar daman dálítið heit og ákvað að mæla hana - þá var hún komin með 39.4 Ég hef lúmskan grun um að væga eyrnabólgan í vinstra eyranu sem kom í ljós á miðvikudaginn sé að gera þennan óskunda…en læknirinn vildi bíða og sjá hvort hún færi. Þetta er orðið frekar leiðinlegt ástand á dömunni minni og vonandi fer þetta bara að ganga yfir … mér finnst eyrnabólgan samt farin að verða dálítið algengur gestur hjá okkur.
Annars hefur hún bara haft það ágætt þessa viku sem hún var hress. Hún var allan daginn á leikskólanum á föstudaginn og hitti síðan Darra eftir leikskóla og svo Tinnu um kvöldið. Þær Tinna eru bara sætastar saman núna - orðnar voða góðar vinkonur og byrjaðar að leika sér aðeins saman og kalla síðan hástöfum á hvor aðra. Þegar líða fór að háttatíma fór Saga að verða eitthvað þreytt á vinkonu sinni og skammaði hana í gríð og erg Helgin leið í rólegheitum - við fórum reyndar á dótamarkað í Perlunni og keyptum dúkkuvagn sem vakti mikla lukku. Síðan var Ólöf hjá okkur á sunnudaginn og það fannst Sögunni ekki slæmt.
Annars er lítið í fréttum og við ætlum bara að einbeita okkur að því að láta okkur batna mæðgurnar. Erum frekar leiðar á þessu ástandi. Vonandi er þetta bara einhver hitatoppur og hún kemst kát á leikskólann á fimmtudaginn!

Saga Guðrún er orðin mikill söngfugl og hefur mjög gaman af því að láta syngja fyrir sig. Við erum söngvasveinar og einn lítill, tveir litlir, þrír litlir eru í miklu uppáhaldi og þá með því að telja ýmist táslur eða putta á sjálfri Sögunni eða einhverri af dúkkunum hennar sem eru sjaldnast langt undan. Hún er meira að segja farin að myndast sjálf við að tralla og syngja og ótrúlegt hvað hún endist við að hlusta á gaulið í mér. Í hvert skipti sem lagið er búið þá heyrist: “jámm” eða “meija” og maður á helst að byrja upp á nýtt.
Annars er lítið að frétta af litla sílesandi syngjandi matargatinu okkar. Hún varð jú auðvitað lasin á sunnudeginum þar sem ég er í skólanum þessa viku. Hún fékk einhverja óskemmtilega magapest með hitavellu og svona. Það var svo lán í óláni að Ólöf frænka er líka veik og Saga Guðrún eyddi gærdeginum í góðu yfirlæti á Álftanesi - raðaði þar í sig ávöxtum og hafði það gott. Hún var svo heima með pabba sínum í dag enda enn með hita í gærkvöldi en er núna hin kátasta og ætlar að mæta hress á Klambra á morgun. Hún er samt byrjuð að hósta aftur og við á þessu heimili erum farin að bíða spennt eftir vorinu. Þessari veikindatíð má fara að ljúka - þó fyrr hefði verið hér á heimilinu.
Í gær vorum við að keyra pabbann á heimilinu í skólann. Seinustu þrjár vikur höfum við skutlað honum í skólann einn seinnipart dags og farið svo sjálfar í heimsókn á Birkimelinn á meðan hann er í skólanum. Þegar við ókum inn í Hringtorgið í Vesturbænum byrjaði mín kona að klappa og hrópa á “amma amma.” Henni varð þó ekki að ósk sinni heldur var brunað með hana út á Álftanes í það skiptið.
Annars er Saga Guðrún orðin dálítið rugluð í ríminu. Föstudags, laugardags og sunnudagskvöld fórum við öll saman í afmælismat. Eins og góðum gestum sæmir færðum við afmælisbörnunum pakka sem daman var ekki alveg nógu kát með að eiga að láta af hendi. Hún er áreiðanlega farin að halda að við þurfum að múta fólki til að fá að koma í heimsókn!
Ætli ég segi þetta ekki bara gott héðan úr Fellsmúlanum. Það er leiðinda spam búið að vera að flækjast í gestabókina okkar … og mig langar endilega að sjá skemmtilegri færslur en það Hún Ólöf á alveg heiður skilinn fyrir að vera dugleg að kvitta - bæði þar og við myndirnar!

Saga Guðrún er búin að hafa það alveg bara mjög fínt undanfarna viku. Hún virðist vera búin að jafna sig á kvefinu og hóstanum sem var að hrjá hana.
Á fimmtudaginn í seinustu viku prófaði hún að leggja sig í leikskólanum. Ég var með pínu hnút í maganum en þetta var sko ekkert mál Hún er svo örugg þarna að hún er til í næstum hvað sem er - fyrir utan það hvað hún er orðin þreytt í hádeginu. Hún þarf nefnilega að vera tvö daga fram eftir degi í næstu viku þegar ég fer í skólann.
Loksins loksins virðist litla rófan vera að átta sig á því að það er ekki alvitlaust að borða. Hún tók við sér á bolludaginn í seinustu viku og er búin að vera ótrúlega dugleg. Mér leist nú ekki á blikuna á sprengidag og varð að stoppa hana eftir óhugnanlegt magn af saltkjöti og baunasúpu! Vonandi er þetta komið til að vera Saga Guðrún er líka algjör kelirófa. Það er alveg æðislegt hvað hún er alltaf tilbúin til þess að knúsa og kyssa - hún er alltaf til í að knúsa og kyssa mig en er oftast til í að knúsa pabba sinn. Þessa dagana er hún líka alveg bókasjúk - hún vill lesa bækur endalaust og er alveg sama hvað það. Það mega vera einfaldar harðspjaldabækur en hún hefur líka alveg þrek í að hlusta á lengri bækur, eins og Trillurnar þrjár. Henni finnst dýrabækur sérlega skemmtilegar og eins bækur þar sem bolti kemur við sögu! Hún er líka að taka stöðugum framförum í talinu - kallar núna á Tinnu vinkonu sína í tíma og ótíma Jafnvel þó að hún sé eiginlega pínu hrædd við hana!
Helgin var annars mjög róleg og góð. Við fórum aðeins að versla í Kringlunni og Saga gekk þar berseksgang. Svo vorum við bara heima að dúlla okkur en fórum út að borða og daman var eins og engill á meðan. Svo kíktum við á ömmu og afa á Birkimelnum og hún klappaði bara fyrir því að leggja í stæðið hjá þeim! Í gær eyddum við svo gott sem öllum deginum upp í Ingunnarskóla á taekwondo móti - Iðunn, Ari & Halli voru öll að keppa. Við gáfumst upp og fórum heim áður en röðin kom að Halla. Saga var á fullu allan daginn og var dauðþreytt þegar komið var heim. Hún hljóp um allt og lagði sitt af mörkum við að hvetja og klappa Hún er líka orðin ótrúlega dugleg á leikskólanum - hleypur upp í fangið á kennurunum sínum og gleymir alveg að þurfa að kveðja mig Við eigum sko án alls efa duglegustu stelpuna í heiminum