Saga Guðrún & Arney Vaka

Gleðilegt sumar!!!
Daman fékk göngugrind í sumargjöf og skrapp í heimsókn á Álftanesið og skemmti sér vel á sumardaginn fyrsta. Hún er ekki alveg búin að fatta tryllitækið sem göngugrindin er en er að átta sig á því að hún á auðveldara með að tæta í henni. Búin að ná í músina á tölvunni minni einu sinni og eins í fjarstýringu og ekkert lítið ánægð með sig!
Óli kallinn er sárlasinn, búinn að vera lasinn núna svona upp og niður í á þriðju viku en við mæðgur erum stálslegnar. Núna er hann eiginlega bara fárveikur og búinn að vera síðan fyrir helgi og við búin að vera handviss um að Saga sé að verða veik. Það virðist þó ekki vera heldur er hún bara að uppgötva að það er svo notalega að kúra og knúsast í fólki. Leggur hausinn upp að manni og hefur það gott … bara sætust!
Við fórum tvær einar í sundið á laugardaginn og það gekk vonum framar. Saga Guðrún var heldur betur dugleg - stóð sig alveg eins og hetja. Kafaði alveg mjög oft og kvartaði bara aðeins í seinasta skiptið! Nú eigum við bara tvo tíma eftir og erum að stefna á að fara á framhaldsnámskeið.
Í gær fórum við svo og hittum nokkrar októbermömmur og það var rosalega gaman. Saga virðist vera svona nokkurn veginn hætt við að vera hræðslupúki þó að það komi stundir … eins og þegar það er tosað í hárið og svona sem henni ofbýður. Í dag í Hinu Húsinu tættu þær Tinna Mjöll bókina hennar Tinnu af hvor annarri í gríð og erg. Svo kom Þórdís í heimsókn núna í kvöld en hún hefur ekki komið síðan í byrjun janúar svo stelpan hafði aldeilis breyst, stækkað og þroskast síðan þá! Eftir smá byrjunarerfiðleika leist henni bara vel á Þórdísi og var alveg til í að kjafta svolítið við hana.
Svo er mikið ánægjuefni að hún er alveg komin yfir þetta vesen að vilja hvergi annars staðar drekka en heima hjá sér! Hún er búin að drekka núna úti um víðan völl bara, í margmenni og allt og ekkert mál. Í dag byrjaði hún nú líka bara að banka í brjóstið og reyna að drekka í gegnum bolinn svo ég er alveg í skýjunum með hana. Svo er kúkavesenið alveg á réttri leið líka þannig að það er tóm sæla í gangi núna svona fyrir utan veikindin á pabbalíusi. Greyið kallinn sem er að byrja í prófum eftir 4 daga Við ætlum að vera sérlega duglegar að vera ekki heima og gefa honum frið svo ef einhver vill bóka okkur í heimsókn þá bara endilega

Jæja ennþá eru bara komnar þrjár tennur en núna virðist þessi tanntaka vera farin að pirra hana og hún er búin að eiga frekar erfiða daga undanfarið. Hún er allt að rjúka upp grátandi og finnst voða gott að láta tannbursta sig og gómurinn er alveg svolítið bólginn í kringum framtennurnar. Svo það er aldrei að vita nema að tönnslunum eigi eftir að fjölda á næstunni.
Hún Saga Guðrún var alveg ofboðslega dugleg í sundi á laugardag. Grét bara ekki neitt og var alveg bara ótrúlega flott að kafa og skemmti sér hið besta. Á meðan við biðum svo eftir pabba hennar í sundlauginni þá varð smá slys en það var gott að við fjárfestum í kúkheldum sundbol. Svolítið skondið að barnið sem kúkar helst aldrei skuli allt í einu láta vaða í sundi! Annars standa þau mál svolítið betur … þau eru ekki komin í lag og hún þarf ennþá hjálp en það kostar ekki fljót af tárum og hávær öskur.
Við fórum í Hitt Húsið í gær eins og venjan er á þriðjudögum og aldrei þessu vant var Saga Guðrún bara lítið sem ekkert hrædd við hina krakkana, togaði dót af bæði Tinnu & Tristani og kippti sem ekkert upp við lætin í þeim. Ég var ekkert smá ánægð með hana!!! Annars er bara ekkert að frétta … við erum að hugsa um að kaupa göngugrind handa dömunni þrátt fyrir teppin því váááááá hvað henni virðist finnast það gaman þegar hún hefur fengið að prófa það! Og miðað við kraftinn í henni þá drífur hún alveg ábyggilega á teppinu! Ég vil helst að sjálfsögðu gera það í dag en það er aldrei að vita. Við ætlum að skreppa í heimsókn til Söndru & co áður en við förum í mat til ömmu og afa … kannski maður geti komið við og keypt eina göngugrind á leiðinni! Aldrei að vita!

Þriðja tönnin er mætt í góminn! Steinunn fann hana, hún er uppi og við hliðina á framtönnunum Saga Guðrún er greinilega ekki hætt að safna
Annars fórum við til barnalæknisins í dag. Núna erum við að prófa eitthvað krem og taka fyrir það að þetta sé sálrænt. Honum fannst ansi líklegt að einhvern tímann hefði verið eitthvað sem ylli henni sársauka við þetta og hún væri einfaldlega hrædd við að kúka. Þetta er svona 3ja vikna ferli að athuga málið en annars verðum við að fara til meltingarsérfræðings og láta athuga málið betur! Nú er bara að krossa putta og vona að þetta gangi einfadlega!

Hér er búið að vera nóg að gera undanfarið. Saga Guðrún er búin að fá fullt af frændum og frænkum í heimsókn og er ekkert smá ánægð með það. Henni finnst krakkarnir ótrúlega spennandi og sérlega fyndin - þau þurfa alveg bara ekkert að hafa fyrir því að fá hana til að hlæja Á laugardaginn mætti Iðunn upp í Fjölnishús til að horfa á sundgarpinn og af því ég ætlaði að vera bara á myndavélinni fékk Iðunn að fara ofan í og Saga var alsæl með það. Hún verður bara duglegri og duglegri í sundinu jafnvel þó að afi Addi sé handviss um að það sé ekkert fiskagen í henni (frekar en öðum ;)) Svo tók hún sig til og hagaði sér bara einstaklega vel í mat hjá ömmu & afa á sunnudag, brosti og hló og vildi við alla tala þar til hana langaði að lúra. Svo í gær fékk hún nokkra vini sína í heimsókn og var bara frekar sátt. Hún er í sundi með Tinnu Mjöll & Darra Jökli og hittir Tinnu mjög oft en henni er ekkert alveg sama um þau tvo, þau vilja endilega toga í hana og svo eru þau pínu hávær og hún hefur ósjaldan farið að skæla undan Tinnu og meira að segja Darra líka. Daman var því alsæl með að hitta Stefaníu Dís sem var ósköp róleg og góð og það var alveg greinilegt hvernig klíkumyndunin verður í þessum hóp En hún alveg brosti og hló og var alveg sama þó hún flakkaði á milli fanga og bara mjög sátt við lífið og tilveruna. Það er alveg að verða í minnihluta skiptin sem hún orgar og er ómöguleg við að hitta fólk. Í seinustu viku hló hún meira að segja fyrir alla í Hinu Húsinu mér til mikillar ánægju þar sem yfirleitt hefur bara verið grenjað þar.
Við erum að fara til læknis á fimmtudag út af kúkamálunum - en um leið og ég pantaði tímann þá fór hún að kúka eins og herforingi. Ég þori samt ekki að afpanta tímann og ætla ða mæta meðan hana af því að annars hættir hún ábyggilega um leið. En ég er nokkuð viss um að tilhugsunin um lækna hafi losandi áhrif á barnið Annars er hún bara hörkudugleg núna, veltir sér í allar áttir og er eiginlega bara farin að sitja. Vantar herslumuninn þegar eitthvað spennandi er í boði

Við fórum í skoðun á mánudag og daman er orðin 6675gr og 65 cm og með 44 cm í höfuðummál. Hún er bara mjög fín þó að kúrfan hennar hafi aðeins lækkað. Hjúkkan var afar ánægð með hana og gaf henni 10 í einkunn fyrir allan þroska. Hún vildi líka meina að meltingakerfið myndi sennilega taka við sér þegar hún færi að fá fjölbreyttari fæðu og núna fær hún hægðalyf 1x á dag og alltaf perur eða sveskjur saman við grautinn til að mýkja hægðirnar og það virðist vera að ganga. Amk voru bara fjórir dagar á milli hjá henni núna og það þurfti ekkert að hjálpa henni. Það er alveg framför! Svo ráðlagði hún okkur líka nýja tegund af graut sem Sögu líkar mjög vel … með ávaxtamaukinu útí. Svo er hægðalyfið í sérstöku uppáhaldi enga ógeðsleg sykurleðja og er sko tekið inn með bestu lyst.
Amma Edda og stelpurnar komu í mat til okkar á mánudaginn og Saga byrjaði á því að taka smá syrpu. En eftir að hafa fengið sér að drekka og svona lék hún á alls oddi og tók góð hlátursköst fyrir þær en yfirgaf samkvæmið snemma til að fara að sofa. Hún vill samt yfirleitt ekki fara að sofa þegar það eru gestir því hún er viss um að hún sé að missa af einhverju Í dag kom svo Iðunn frænka og var hjá okkur en hún er búin að vera lasin og orðin leið á að hanga heima. Saga Guðrún varð dálítið hissa þegar hún var allt í einu komin upp í rúm til hennar eldsnemma í morgun. En það stóð ekki lengi og hún var alsæl með að hafa hana hjá sér og Iðunn var ekkert smá dugleg að leika við hana og stússast með hana Það var mikið hlegið og mikið fjör og alveg fullt af myndum komnar í albúmið Svo fékk daman vatnsmelónu að smakka og það fannst henni ekki neitt lítið gott!!! Verst að hún nær að bíta alltof stóra bita af en það er allt í lagi að gefa henni smá

Héðan er allt gott að frétta Loksins komumst við aftur í sund en það eru þrjár vikur síðan við mættum seinast. Reyndar féll niður einn tími en Saga Guðrún var nú ekki búin að gleyma töktunum og stóð sig rosalega vel. Kennarinn sagði síðan við okkur eftir tímann að það borgaði sig að vera ákveðin við þessa dömu því hún hefði greinilega tendensa til að vilja stjórna Ég veit ekkert hvað maðurinn er að tala um Annars erum við bara búnar að brasa það sama við mæðgurnar, kíkja í Hitt Húsið, fara í göngutúra, heimsóknir og bara þetta venjulega. Svo er daman að fara í fimm mánaða skoðun á mánudaginn og sennilega förum við til barnalæknis fljótlega til að kíkja á þetta kúkavesen á henni…hún kvelst svo litla greyið jafnvel þó að hún sé að fá hægðalyf á hverjum degi. Hún er alveg dauðþreytt og athyglissjúk núna eftir sundið enda eiginlega ekkert búin að sofa. Hún vill sko hundrað og tuttugu prósent athygli og ekkert annað. Reyndar er hún farin að hafa alveg ofboðslega gaman að sitja í ömmustólnum sínum og fylgjast með í eldhúsinu og getur alveg setið góða stund þar. Annars er hún voðalega lítið fyrir það að dunda sér ein … en það kemur allt, ég finn mikinn mun á henni núna. Í kvöld gerðist líka svolítið stórmerkilegt í Sögulandi - Saga drottning drakk bara sitjandi upp í sófa í fyrsta skipti í áreiðanlega tæpa tvo mánuði. Ekkert smá ánægð með okkur mæðgur fyrir þær sakir í bili Látum þetta gott heita í bili og skrifum aftur þegar daman er búin í skoðun…