Saga Guðrún & Arney Vaka

Úff hvað tíminn líður hratt! Október var lengsti mánuður sem ég hef nokkurn tímann lifað en nóvember bara hvarf! Þetta er alveg ótrúlegt! Time is fun when you’re having flies - eins og Sandra orðaði það Hjúkkan bara gleymdi okkur í dag Ég hringdi niður á heilsugæslu um 16:30 og þá hafði Saga bara ekki átt neinn tíma hjá þeim og hún hringir í mig aftur á miðvikudag. Ég var pínufúl - búin að lenda tvisvar í veseni hjá þeim á stuttum tíma. En það skiptir nú ekki öllu … hún verður þá bara ennþá þyngri þegar hún kemur loksins Í gær fórum við í afmæli til langömmu Rönku. Þetta var fjórða afmælið sem Saga fór í á fjórum vikum! Þetta var nákvæmlega ástæðan fyrir því að mér var svona mikið í mun um að stelpan kæmi í heiminn fyrir mánaðamót því það er sko meira en nóg að gera í nóvember í fjölskyldunni.
Hún er öll að koma til í maganum. Ég læt bara engan lauk ofan í mig ( nema smá hvítlauk einstaka sinnum - hann virðist ekki hafa áhrif ) og hún er nokkuð sátt. Hún fær nokkrar pílur á hverju kvöldi en ekkert svakalegt … þeim lýkur yfirleitt með rokna ropa eða prumpi sem er bara gott mál. Vonum að laukurinn hafi bara verið málið. Annars er daman orðin svona ferlega brosmild þegar mamma hennar er annars vegar, fljót að brosa til hennar enda eins gott að hafa mjólkurbúið sér velviljað! Eina vandamálið að ég varð stundum einum of hrifin og greyið mitt litla hrökk í kút þegar ég var að dásama þetta sæta bros hennar! Stefnan er sett á það að vera komin með brostæknina á fullt sem fyrst til að geta tekið á móti Steinu frænku með risastóru brosi eftir eina og hálfa viku

Litla magakveisu stelpan okkar er búin að vera rosalega óróleg undanfarin kvöld. Droparnir virðast hafa hjálpað henni svolítið því hún hefur ekki tekið 5 tíma törn síðan hún fór að fá dropana en eitthvað er nú samt að angra hana ennþá! Núna erum við mæðgur búnar að liggja upp í rúmi og syngja og hossa, strjúka og klappa alveg heillengi og hún er loksins að róast. Pabbinn myndaðist við að læra á meðan og er núna skriðinn upp í rúm með stelpunni!
Fyrir utan þetta vesen gengur allt vel, hún stækkar bara og stækkar, farin að brosa til mömmu sinnar soldið og einstaka sinnum til pabba síns! Amma Móna & afi Addi komu í heimsókn í gær og afa hennar leist ekkert á hvað hún væri að stækka mikið og fullorðnast … hann hefur nefnilega hingað til grínast með að kalla hana Smá-Sögu en núna sér hann fram að á að hún sé að verða skáldsaga og það í tveimur bindum Mér finnst þetta alveg ótrúlega krúttlegt og held að hún verði bara alltaf Smá-Sagan mín Við erum aðeins að róast í myndatökunum núna þessa dagana en erum búin að bæta inn möppu fyrir myndbönd í myndaalbúminu. Það er svona kannski mest hugsað fyrir Noregsbúana en auðvitað bara plús fyrir þá sem fá líka live-version af og til Ég set inn fleiri myndir fljótlega … vonandi um eða eftir helgina bara. Núna ætla ég að elta feðginin upp í rúm.

Ps. Hvernig líst ykkur annars á nýja útlitið á síðunni?

Hjúkrunarkonan kom í heimsókn nr. 2 í gær og litli hlunkurinn okkar er búin að þyngjast um 4 - 500 gr á einni viku Þetta voðalega pons sem var verið að hafa áhyggjur af er bara komin yfir meðalkúrfuna! Greinilegt að sumir framleiða bara rjóma Hún varð meira að segja ekkert voðalega reið þegar hún var vigtuð Annars er daman búin að vera að fá aðeins í magann undanfarin kvöld svo við erum farin að gefa henni minifom dropa til að hjálpa henni að losna við þetta loft. Hún er nefnilega frekar léleg við það… henni fannst ég samt stórskrýtin að gefa henni eitthvað með skeið en er samt alveg sátt við það núna.
Það er brjálað að gera í social-lífinu hjá okkur og Saga er að fara í þriðja afmælið sitt í dag … það er nú ágætt þegar maður er bara rétt þriggja vikna og eins dags gamall!
Ég veit að það eru margir að bíða eftir myndum en ég ætla að reyna að setja inn fleiri í kvöld

Við ákváðum að fara út í snjóinn í dag og heimsækja Kol. Okkur er nefnilega boðið í afmæli uppfrá um helgina og okkur fannst það nú skynsamlegt að láta þau skötuhjú hittast áður en húsið yrði fullt af gestum og kallinn okkar stressaður. Við erum náttúrulega mjög ofarlega ef ekki bara efst á vinsældarlistanum hjá honum Koli þannig að aldrie að vita hvernig hann myndi taka prinsessunni.
Fyrst ætlaði hann ekki að hleypa okkur upp stigann … hann þurfti svo mikið að skoða. Svo þurfti að lykta svolítið vel og pota nefinu í hana og skoða, og lykta svolítið meira. Þetta tók alveg góðan tíma og hann var alltaf að koma að kíkja á hana. Svo þegar Óli tók hana í fangið þá kíkti hann aðeins á þau en var svo bara límdur við mig. Hann þurfti voðalega mikið að láta mig knúsa sig …
Þetta gekk samt rosalega vel Ég er ekki frá því að hann hafi verið pínu abbó þessi dúlla! Saga ákvað síðan að fyrst við værum að heimsækja Kol þá væri komin tími til að hún merkti sér svæði og ákvað að nota hans aðferð við að eigna sér rúmið hans Ara! Ara fannst það nú bara svolítið fyndið að hún skyldi pissa í það
Það eru komnar myndir af þessu ferðalagi í dag …

Hér er allt í góðum gír. Saga Guðrún er alltaf sama ljósið en er samt aðeins farin að láta heyra meira í sér sem er bara gott mál … Greinilegt að undir þessu ljúfa yfirborði er barn með skap Við fórum öll í mat til langömmu Drífu í gær og stelpan var miðpunktur athyglinnar. Hún var ekki mikið að kippa sér upp við það, ældi svo vel og vandlega yfir sófann og teppi á gólfinu og kíkti svo aðeins á frænkur sínar. Svo svaf hún bara til hádegis í dag eftir að við komum heim, með nokkrum drekkutímum inn á milli. Í dag vakti hún síðan meira og minna til 18 og við hjálpuðum henni síðan að vakna til að fara í bað. Það gekk mun betur en í fyrra skiptið og ég held barasta að henni hafi litist ágætlega á þetta. A.m.k. var ekki farið að mótmæla fyrir alvöru fyrr en hún var komin í handklæðið eftir á.
Á myndunum sem voru teknar í baðinu er bara ekki laust við að daman sé pínu rauðhærð … er mamman ímyndunarveik eða hvað?

Það er búið að vera brjálað að gera hjá okkur undanfarna daga! Nei, það er kannski svolítið orðum aukið en við fórum með dömuna út í fyrsta skipti í gær síðan hún var útskrifuð af spítalanum. Við fórum í heimsókn til ömmu Eddu og frænknanna í Kópavoginum og Saga var alveg eins og ljós. Helga frænka, Kristjana & Guðrún komu að kíkja á gripinn og það var varla að hún nennti að láta rifa nema í annað augað til að skoða þær á móti!
Í dag fórum við svo í smá afmælisveislu til ömmu Mónu en lúðinn ég gleymdi því að þetta var afmælisveisla og steingleymdi að færa henni móður minni eitthvað. Mér var samt snarlega fyrirgefið þar sem að ég kom með vinsælustu manneskjuna á svæðinu með mér. Á morgun er svo annað afmæli, en við förum í mat tillangömmu Drífu en svo ætlum við bara að taka því rólega fram að næsta afmæli sem er eftir viku!
Í kvöld er hún búin að vera í beinni útsendingu í gegnum msn til Noregs, Bandaríkjanna, Grafarvogs og hérna í Holtunum þar sem aðdáendur eru að dást að henni Þvílíkt tæknivædd fyrirsæta strax á unga aldri!
Saga Guðrún er búin að vera pínulítið óróleg undanfarin kvöld og hefur verið að ætlast til þess að fá bara að liggja á brjóstinu á fimm mínútna fresti til að róa sig niður svo ég fór og keypti handa henni snuð. Þvílík og önnur eins hamingja hjá barninu og þegar snuðið rataði upp í hana í fyrsta skipti. Hún bara sýgur og sýgur og heyrist ekki múkk nema einstaka tíst. Það er heldur ekki séns að við fáum að taka það af henni aftur. Hún er alsæl með þetta og það liggur við að ég sé að fá samviskubit þar sem hún er alveg ótrúlega vær og þetta virðist laga þennan litla óróleika sem var í henni. Hún liggur núna í vöggunni og sýgur snuðið , voðalega sæl með sitt og heyrast þessi líka værðarhljóð í litlu snúllunni.
Svo er bara spurning hvort að snuðið verði áfram svona vinsælt

Jæja, þá er hjúkrunarfræðingurinn í ungbarnaeftirlitinu búin að koma í fyrstu heimsóknina og auðvitað leist henni vel á dömuna. Fröken Saga Guðrún var ekki beint hrifin af því að vera rifin úr öllum fötunum og fyrst teygð og toguð og síðan troðið í bleyju og vigtuð! Hún gólaði alveg af öllum kröftum á okkur fyrir að láta þetta viðgangast og var ekki alveg á því að gleyma þessu. Þrátt fyrir að vera óttalegur letingi og finnast best af öllu að sofna bara á brjóstinu er hún að fá alveg nóg og vel það því hún er orðin þrjú og hálft kíló Ég þarf semsagt ekki að hafa áhyggjur lengur, þó að hún taki ekki nema 10 - 15 mín til að svolgra í sig í hverri gjöf

Saga Guðrún er aðeins farin að láta í sér heyra. Yfirleitt er það bara af því að hún er orðin svöng en ég fæ líka að heyra það ef ég sný baki í hana í rúminu eða læt mér detta í hug að stökkva fram í eldhús á meðan hún er hálfsofandi upp í rúmi Hún er farin að vaka heilan helling og núna kemur meira að segja fyrir að hún sofni ekki á meðan hún er að drekka … algjör dugnaðarforkur litli letinginn minn!
Á morgun fáum við svo hjúkkuna úr ungbarnaeftirlitinu í fyrstu heimsóknina. Það verður forvitnilegt að sjá …
Við erum pínulítið að róast í myndatökunum … yfir 400 myndir á 12 dögum verða þó að teljast ágætt magn en í dag er bara búið að taka þrjár myndir! Ótrúlegt en satt. Það verður sennilegast eitthvað svipað á morgun þar sem Óli verður í skólanum fyrir hádegi og að vinna allan daginn og það er nú einu sinni hann sem er duglegur í myndatökunum.

Helgin hefur liðið ótrúlega hratt og Saga Guðrún verið ótrúlega góð. Hún er búin að vera ótrúlega dugleg að vaka og hefur fengið að sofa ótæpilega mikið í fanginu á okkur til skiptis Þrjár langömmur eru búnar að koma og kíkja á dömuna og leist að sjálfsögðu vel á hana.
Annars var hún í sínu fyrsta baði núna fyrr í kvöld. Það gekk ágætlega svona frá okkar sjónarhorni en hún Saga Guðrún var ekki ánægð með þetta. Um leið og hún var komin ofan í vatnið byrjaði hún að orga Þetta var því bara stutt og laggott og ekki tók betra við þegar hún var komin á skiptiborðið og átti að þurrka henni. Henni fannst þetta allt afskaplega illa gert af okkur og við fengum óspart að heyra það. Þetta var lengsta og ákafasta grátkastið hennar hingað til og ekki laust við að það hafi aðeins tekið á okkur Pabbi hennar tók hana svo í fangið og náði að hugga hana en um leið og við fórum að klæða hana fengum við aftur að heyra það. Eftir smá mjólkursopa var hún hinsvegar orðin alveg úrvinda og er núna steinsofandi í fanginu á pabba sínum Óli ætlar að reyna að fara í skólann á morgun … mánudagar eru frá 8 - 18 svo við eigum eftir að sjá hvernig það gangi að fara frá okkur mæðgunum í svona langan tíma Það vex mér nú nógu mikið í augum að fara til mömmu og pabba í sturtu, sem mér hefur nú samt tekist að gera!

Hér gengur allt alveg rosalega vel! Hún Saga er algjör draumur og við foreldrarnir alveg í skýjunum! Hún er búin að skilja það (í bili að minnsta kosti) að það er skynsamlegra að vaka á daginn og lúlla sér á nóttunni! Það er búið að koma fullt af gestum og hún tekur það að sér að heilla alla upp úr skónum. Langamma Bogga kom í dag og færði henni ótrúlega fallegt heklað teppi, hosur og vettlinga. Alveg meiriháttar! Svo kíktu Ágústa & Þórdís á okkur líka.
Núna er búið að útskrifa okkur úr heimaþjónustunni og alvara lífsins að taka við. Reyndar þarf ég kannski að fara upp á spítala á morgun en það er lítið mál fyrir Soffíu stál Við mæðgurnar ætlum að hafa það gott um helgina á meðan pabbinn á heimilinu hefur hugsað sér að endurnýja gömul kynni við stærðfræðina sem hefur mætt algjörum afgangi undanfarna viku. Fiðurfénaðurinn á heimilinu er hroðalega afbrýðissamur út í nýja ungann og frú Þoka lætur okkur óspart heyra það. Þau eru samt óttalega forvitin og klessa sér yfirleitt í það horn þar sem við erum næst þegar hún er t.d. að drekka. Þau eru ekki alveg að skilja hvað er eiginlega í gangi …